U Montri wa pait ya ka chnat puræ puthi ha ka jylla, u Lahkmen Rymbui da pyntip u wa ka chnat da phah ko ya u Director ka Higher & Technical Education wow phah cha ki College kiwa em ha ka jylla wow e yukheiñ yei em ki khynnah wa da 18 snem chaneiñ kiwa da dep yoh yei tika yada COVID-19.
Da ong u wa ka chnat ka kwah ko wow tip hadooh katno Percent da lai i e tika ki khynroo khyllood kiwa lai puræ yow sñiawthooh wow lai chakhmat, wei hadien wa da yoh ya ka yukheiñ, ka chnat daw bichaar biang ko wa lada man næ ym man wow wai biang ya ki College.
Da ong u wa ha kiwi ki jylla da sdang wow wai wei daw wai ki ter ter ya ki thaw puræ, kamjooh ha ka jylla leh da sñiawthooh wa i sikai ha ki kamra Class man ko iwa emkaam wei toh u man kiwa da khreh khamtam kiwa da 18 snem chaneiñ, neibhah wa em i eh ha ki Online Class.
Da ong u wa i yutip wa da paan da ka chnat, ki College toh u phah noh ki rap smat, deiwa pynrap wa ka chnat daw pait wei bichaar bniah ko yei long i man ka jylla na ka khlam.
Hawa kylli wa lada ka sorkar u chim ko wa i tika u man i iwa emkaam neibynta wow wai ya ki College, u Rymbui da ong u wa kamwa man, hadooh kattæ, du kiwa da yoh tika kiwa ye u yada na u khñiang, deiwa pynrap leh wa ym mut wa i e tika u emyatoh i wa i wai ya ki College, tangwa pynchngaaiñ i ya kiwa lai cha ki thaw puræ.
Hawa kylli chooh chooh hawa yatoh wa ki khynnah Class X chapoh, u Rymbui da ong u wa ka chnat dang bichaar ko neibhah kamwa man katni, i sdang wai ya ka jylla dang lai i ha kani ka chi tayaw, tangwa da pynrap u deiwa ong wa iwa emkaam palat toh wow e sikai ya ki khynnah ha ki kamra ki thaw puræ, wei kammon wow sdang hap wow bichaar katkam wa yah i por, neibhah ym ye wow lai lait won ya i chait i khiah ki khynnah skur.
U Montri da kyntu u leh ya kiwa sikai wa ki khynnah kiwa da palat 18 snem wow e tika yow yada na u COVID-19 neibynta wow chngaaiñ wei wow yada ya idæ, neibhah daw yarap ko leh ya ki yung ki sem.
