U National Vice President ka National People’s Party (NPP), u Prestone Tynsong da ong u wa ka NPP da booh ko ya ka thong wow jop palat 32 ngut ki MLA ha ka Election ha u snem 2023.
Ini i klam u Prestone toh hadien wa psiah u MLA wa ki MDC warim cha ka Party, wa kynthup ya ka MDC wa katni wa jop na ka PDF na Umsning, ka Macdalyne S Mawlong. Da ong u wa katwa dang mih ki snem dang sñiaw chit i kreh ka Party, deiwa pynrap wa ini ym mut i wow yoo kynchiñ ya kiwi ki seiñ ha ka sorkar, tangwa ka thong man ko wow jop palat 32 Seat ha u 2023.
Da kob u leh wa ka NPP u jop ko ym duna ya ka 14-15 ngut ki MLA ha Manipur, heiwa da ong u wa i yakhun ha katai ka jylla man ko hapyrdi ka NPP wa BJP, iwa pynyoo wa ka NPP khlan bha ko ha thaaiñ North East.
Ha kani ka sngi u Prestone da pyntikna u wa ka Macdalyne daw yakhun MLA ko na Nongpoh wa u Martin Danggo na Ranikor.
