Shillong: Kiwa yahkhmat ka Seng Samla Tynring, da pynbaad ki wa u Sordar ka Raid Tynring u C.A. Diengdoh da leh u ya ki kaam samen khlem tip ka dorbar raid deiwa pam khiar u ya ki dieñ neibynta wow pdiang ya ka yaseiñ Synod ka wow man ha u snem wow wan ha kani ka thaw wa tip kam ka Lumswai.
Hawa yaklam wa kiwa e khubor ynne ka sngi, u secretary ka Seng Samla Shnong Tynring, u Bapynbiang Nongspung chirup wa u President u Lesterwell Nongrum da pyntip ki wa ini i thaw heh i kamwa 3-4 acre wei u Sordar ym em u khut yaklam u wow pynbait yei pam ya kini ki dieñ wa em heini.
Katkam wa pynbaad ka Seng Samla Shnong Tynring, da ong wa kini ki loom da syllen ki wei ymtip wa heiwon i rukom da pynemkaam ya ki hadien wa da pam ya ki.
Da pynbaad leh wa uni u Sordar ym jooh khut dorbar u nadooh u snem 2011 hadooh kini ki sngi lait nei khut dorbar u wow baamdoh yonglang hadien wa ka KHADC da pyndam ko ya ka suspension ya oo ha u snem 2015.
Heijooh i por da pynyoo ki ya ka chithi wa phah da u Sordar ha ka 18 Kmaichonglad 2015, wa da pdiang yeiwa da paan wow pynman ya ka Synod ha kani ka thaw wa tip kam ka Lumswai wei da ebor ya ka Executive committee wow pynkhooid ya ki dieñ na kani ka thaw.
Ka chithi da ong ko leh wa boonsien ki dkhot jooh lai sorjamin ki ya kani ka thaw chirup wa ki sahep na PWD, MLA ka thaiñ wa kiwi kiwi.
Da pynyoo ki yeiwa da pynche u Sordar ha ka 15 Kmaichonglad 2016, kawa da pynyoo wa ka dorbar Tnat Raid Tynring wa man ha ka 18 Kmaichonglad 2015, da pdiang wei da mynjur yeiwa dawa wow pynman ya ka Synod ha kani ka thaw wa tip kam ka Lumswai wei da ebor ya ka Executive committee wow pynkhooid ya kani ka thaw.
Neidaw wa ka chnong dang sahdien ko ha kiwa boon ki liang heiwa ki tre chnong dang yooluti ki yei roi i paar kamtæ da pdiang ki yei wan ka Synod wei ya ki dieñ da yooluti wa daw yarap ya kiwa chong chnong wow chna yung ya ki.
Discussion about this post