U Montri Rangbah ka jylla, u Conrad Sangma hawa e yei jubab ya ka Cut Motion wa da wanrah ynne ka sngi hapoh ka Dorbar Synrai da ka liang pyrchah, da pyntip u wa ka Meghalaya da chah ktah bha ko ha ka khlam COVID-19 wei ha ka la-ær wa ar ka khlam da dooh leh ya kiwa boon ki mynsien wa kordor heiwa ka sorkar da su ko T. 50,000 cha kiwa hayung kiwa yap hapoh ka Chief Minister’s Special Grant kawa da kheiñ nadooh ka 01-04-21.
Ya i su da leh hadien wa da dep pyntikna da ki DC yei daw wa yap heiwa ki DC da phah ki ya ka Bank Account kawa toh u su.
Nadooh ka 01-04-21 hadooh ka 13-09-21 da em 1258 ngut kiwa da khlaad na ka khlam heiwa da su mar T. 50,000 cha kiwa hayung kiwa khlaad wei na kini ki 1258 ngut da dep wow su cha ki 514 ngut iwa da poi T. 2,57,00,000 wei dang sah sa 744 ngut kiwa dang yang wow yoh ya ka Bank Account na ki DC. Kamtæ dang sah ka T. 3,72,00,000 ka wym pu em su hadooh ka 13 tarik uni u bnai kawa daw ku neidaw wa kiwa yap da em ki man-ka-sngi.
Da pyntip u leh kam chibynta wow yarap ya ki Community Covid Management Teams kiwa em ha kylleiñ ka jylla kiwa da yaleh pyrchah ya ka khlam, ka sorkar da e ko T. 5000 kawi ka CCMT kiwa da em 3900 tylli kawa da poi T. 1,94,97,500.
