Ynne ka sngi kawa man ka sngi wa nyngkong yong ka Dorbar Mang Tangka ka JHADC, da man ko leh ka sngi wow sahkynmoo heiwa ka dorbar da pdiang ko ya ki dak thoh namo ki Jaiñtia Phonetic Alphabet.
Ya kini ki dak thoh da wanrah da u Chairman ka Jaiñtia Alphabet Committee uwa man leh u EM ka JHADC, u Phasmon Dkhar.
U Phasmon hawa wanrah ya kani ka bui da khana u ya ka parom wa tbian heiwa kammon da sdang i sñiaw wa emkaam ya ki dak thoh Pnar iwa nadooh u snem 1927 ya iwa da wanrah da u (T) Elbin Pariat wei kat dang lai i por da emkaam wow wanrah wei tipmit noh ya kini ki dak wei ha ka 20 Naitung 2016 da seiñ ya ka Committee wow thooh ki laad ki luti wei wow jied noh ya kini ki dak.
Ya ka bui wa da wanrah ynne ka sngi da pdiang noh ya ka da ka Dorbar.
Hawa yaklam wa u Phasmon hadien wa kut ka dorbar da ong u wa ka dorbar da pdiang ko ya kini ki dak tangwa chong leh ha ki paidbah wow wan chaphrang wow tyrwa lada emkaam wow booh chooh ya ki dak khnang wow yoh u chong pyrkhat wa ki bru chemphang namo ki Linguistic.
Da pynrap u leh deiwa ong wa kani ka sngi u man ko ka wow sahkynmoo yanom neibhah wa da ye wow leh yeini iwa da thrang wei angnood ki paidbah waroh chi kattu.
