U Symbood Montri Rangbah, u Prestone Tynsong uwa man leh u Chairman ka High Level Committee wow kyrriah ya ki bru na Them Metor (Them Iewmawlong), da pdiang sñiawbha u ya i kwah ka Harijan Panchayat Committee (HPC) wow yaklam, heiwa da ong u wa boi daw pynman ya i yachem ha ka tayaw wow wan.
Da ong u wa ka HPC lyngba ka dorkhat cha ka High Court da pynsñiaw ko wa kwah ko wow klam pynbait wa ka sorkar, wei da kyrpaad ki ya ka kasari wa ka sorkar toh u pynbiang ki ya i thaw wow kyrriah.
Heiyatoh wa i thaw wow kyrriah, u Prestone da ong u wa nadooh wa da chna ya ka High Level Committee, i thmu hi toh wow kyrriah noh ya waroh kiwa sah ha ini i thaw chawi tawon.
Tangwa da ong u leh wa ya katni ympu ye u khana lut cheiwon i thaw wei kammon u kyrriah ya ki tangwa daw pait bniah hadien i yaklam wa ka HPC.
