U Lat ka Manipur, u Ajay Kumar Bhalla da pdiang u yei hiar chuki u N Biren Singh kam u Chief Minister tangwa da kyntu u ya oo wow ksoh yei kaam kat hadooh wa ye wow pynbait yei kaam i jaam.
Ini i hiar chuki u Biren Singh toh du hadien kattu katni kynta wa liwan u na Delhi heiwa da yachem u leh ya u heh ka BJP, u Amit Shah.
Ini da jia i leh heiwa ha kani ka tayaaw ka Supreme Court da paan ko yei sabut heiwa da em wa yoh u Record yeiwa klam u Biren Singh kiwa pynbaad wa emkti u hei kynaad ya mynsnaam hapyrdi ki ar jaitbru ka Manipur.
Ha kini ki Recording da chem yeiwa em wa klam u Singh wa toh u e laad ya ki Meitei wow tooh ki ya ki tiar yasiat deilang ki kuli kiwa man ki yong ka sorkar wei ini i kynaad wa da neh da jan ar snem kattu da wanrah i yei dooh i mynsien ki spah ngut ki bru.
Kamwa man kattæ ym pu tip wa lada ka BJP daw thung ko da uwi u CM wa thymme, tangwa u heh ko, u Sambit Patra da em u ha Manipur kattæ.
Neiliang ka Congress da ong ko wa ini da slem bha da toh u leh wow hiar chuki wei da yooluti ki wa u Prime Minister ka ri, u Narendra Modi uwa khlan wow hær na iwi i thaw cha iwi daw hiar u ha Manipur.
Da em leh i suba wa da ini i hiar chuki u Biren Singh daw ye noh u wanrah yei yasuk hapyrdi ki Meitei wa ki Kuki.
U Biren Singh da dooh u leh yei kyrchaan ki MLA ka BJP kiwa boon da lai yachem ki wa ki heh ka BJP ha Delhi.
Ka Dorbar Mang Tangka ka Manipur toh kawa da booh wow sdang ha ka 10 tarik uni u bnai wei da em leh ki MLA ka BJP kiwa da maham wow lai chong cha ka liang pyrchah wei ye u man yow lait na ini i daisarom da pynsmat noh dei hiar chuki najorng wa em leh na No Confidence Motion wa da thmu wow wanrah pyrchah ya u Biren Singh.
Neiliang ki Kuki da pynbaad bait ki wa u Biren Singh toh uwa emkti wow pynchit yei kynaad iwa da sdang nadooh ka 3 tarik u Naisan 2023.
Discussion about this post