Ka Ministry of Information and Broadcasting ka sorkar India da phah khang (Block) ko ya 20 tylli ki YouTube Channel kiwa pynpoor ya ki khubor thok wa man pyrchah ya ka India wa ar tylli ki News Website, deiwa phah ya ka Department of Telecom wow phah ya ki Internet Service Providers wow Block ya kini ki News Channels/Website.
Ka sorkar da ong ko wa kini ki Channel wa Website toh kiwa na Pakistan kiwa da krehlang wow pynpoor ya ki khubor thok kiwa yatoh wa kiwa boon ki jait kaam wa yatoh waka India. Kini ki Channel toh kiwa pynmih leh ya ki khubor pynchongchit hajrong ka Kashmir, ka Indian Army, ki khian paaid ka India, ka Ram Mandir, u General Bipin Rawat wa kiwi kiwi.
I rukom krehkaam toh yow pynsih dur ya ka India deiwa ya krehlang waka Naya Pakistan Group (NPG) kiwa krehkaam na Pakistan deiwa em boon ki YouTube Channel wei em leh ki wym em yatoh waka NPG.
Deiwa kheiñlang da em Subscriber kini ki Channel palat 35 lak ngut wei ki Video waroh da em wa pait la 55 klur sien.
Em leh na kini ki YouTube Channel ka Naya Pakistan Group (NPG) wa pynkrehkaam da kiwa e khubor kiwa na Pakistan.
Kini ki YouTube Channel da booh ki leh ki Video wa yatoh wa i yakhih ki warep, i yakhih pyrchah ya ka Citizenship (Amendment) Act, wei da pyrchang ki leh wow pynchit ya ki khian paaid pyrchah ya ka sorkar India. Da chem leh wa kini ki YouTube Channel da chna Video ki wow pynartatien hadooh yei rukom pynman Election ha ki 5 tylli ki jylla.
