I em ki khyrdop khrong dan wa da e bor da ka Khasi Hills Autonomous District Council ha u sarok Shillong Bypass, da pynmih yei pyrchah na kiwa boon wa lang, wei neiliang ka sorkar jylla da phah ko leh ya ka KHADC wow khang noh chi syndon ya waroh ki khyrdop khrong dan.
Dang ha kini ki kajiak sngi wa dep, kiwa thoh khubor da poi lai luti ki na sarok Shillong Bypass, heiwa da chem wa ki khyrdop khrong dan dang krehkaam ki, hanla da mih i pyrchah neipor cheipor wa man ki pyrchah ya ka aiñ.
Ha katai ka sarokbah wa lai na Mawryngkneng hadooh ka chnong Thangshalai, da em kamwa 4 tylli ki khyrdop khrong dan kiwa yieñ ha waroh arliang ki sarok wei da sakhi leh yei yieñ laiñ ki Truck ha katai ka thaaiñ neidaw wa em ki bru wa ksoh ya ki Truck wa lai lyngba na utai u sarok.
Hawa kylli hajrong i pynkrehkaam ya ki khyrdop khrong dan ka KHADC, u Montri Rangbah ka jylla, u Conrad Kongal Sangma da ong u wa kitai ki khyrdop ym toh twang wow em ki leh, wei da pyntip u wa ka sorkar jylla da dep thoh ko cha ka District Council, heiwa da phah wa toh u khang wei sangeh noh chi syndon i pynkrehkaam ya kitai ki khyrdop.
