15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Phah pyndong ka KHADC ya ka aiñ chong kurim wow pynmiat chooh chooh ya ka

0 Comments
Advertisement ad1
Advertisement ad1

Shillong: Ka Executive Committee yong ka Khasi Hills Autonomous District Council (KHADC) ynne ka sngi da rai ko wow paan biang ya ki ar tylli ki Bill wa da mynjur da ka Dorbar KHADC kawa yatoh wa ka Khasi Social Custom of Lineage Bill, 1997, katæ ka First Amendment Bill, 2015, wa ka Second Amendment Bill, 2018.

U Chief Executive Member ka KHADC, u Hispreaching Son Shylla da ong u wa i phah pyndong ya ka Khasi Social Custom of Lineage (First Amendment Bill), 2015, toh neidaw wa chem yei bakla neibhah da toh wow booh leh ya i rukom jied ya u Rangbah Kur ha katu ka Bill.

U Shylla da ong u wa ye wow booh hi-eh ya u Rangbah Kur ha ka, tangwa kammon won thung ya oo, kammon u kreh u wei da toh wow em da kawi tawon ka aiñ.

Da ong u wa ka Executive Committee dang pynkhreh ko wow chna ya kani ka Bill, u Rangbah Kur wei daw mynjur da ka Executive Order lada ympu em ka dorbar, næ ye leh wow khut ya ka Dorbar kyrpang neibynta wow mynjur ya kani ka Bill.

Ha iwi i liang u CEM da ong u leh wa ka EC da rai ko leh wow phah pyndong chwa ya ka Khasi Social Custom of Lineage (Second Amendment Bill), 2018, wow yoh u pynbait ya ka hadien wa da chem wa em i duna ha ka.

U CEM da ong nu leh wa da pynchiap ya ka Section 3 (d) kawa thymme kawa ong, “kiwon kiwon ki kynthai Khasi kiwa yoh kurim da ki wymtoh ki Khasi daw dooh noh ki ya i tipmit wa man ki ki Khasi wei i yoh myntoi kam ki Khasi.” Da mylliñ leh wow pyndam ya ka Section kawa na khmat kawa ong, “Kawon kawon ka kynthai Khasi kawa yoh kurim da u wymtoh u Khasi wei e jait cha ka hi, ki khon ko u man ki Khasi.”

Chooh chooh da ong u wa em sa kawi ka Clause kawa emkaam wow pynbait chwa ya ka.

U CEM da ong u wa kawi na ki Clause wa emkaam wow pynkylla toh wow daiñ kuna ya kiwa yoh kurim da ki wymtoh ki Khasi, nachwa i daiñ kuna toh T. 5000, wei ka EC da rai ko wow pynku noh ya kani.

Da pyntip u leh wa hajrong kini da thung ya ka Consultative Committee wow ap ya i ood wa i sur yong kiwa boon hadien wa ka KHADC da phah ya iwa da pynkylla ha ka Khasi Social Custom of Lineage Bill, 1997.

U CEM da pyntip u leh wa ka EC daw phah ko yei thoh cha ka sorkar sorkar ha ka 16 tarik uni u bnai, da pynrap u wa ym em luti de ya ka sorkar wow dam u pynuiñ ya kani ka Bill hanlada da phah ko ya ka cha ka tnat aiñ ka sorkar wow bichaar wei wow e yumut.

Share this:
Previous

Da pynman ya ka esikai cha ki warep heiyatoh wa i ri mrad

Next

Thoh ka LJP cha ka sorkar pyrdi yeiwa emkaam wow thung hadooh 840 ngut ki Nurse ha NEIGRIHMS