Phah takit ka sorkar wa yoh hadooh 41 ngut u lai khawai bia ha i thaw wa em u wakreh wa yoh COVID-19

Shillong: Ka sorkar jylla dang yang ko yaka bui (Report) na ki Deputy Commissioner ka Ri-Bhoi District wa East Khasi Hills District, hajrong i yoh wow lai khawai chongkurim cha Assam ki 41 ngut kiwa chong chnong ka jylla.

Hawa kylli hajrong i yoh laad kini ki bru wow lai khawai wot hapyrdi i khang wow psiah wow mih wa kiwi ki jylla, u Deputy Chief Minister ka jylla, u Prestone Tynsong da ong u wa sorkar da phah ko wow takit nadooh ynnin ka sngi wei mynstep ka sngi da phah ya ki DC wow pynbiang ya ka Report.

Da ong u wa ym em hok kiwon kiwon leh wow lehke næ wow booh hei maa yei mynsien ki paidbah, deiwa maham leh wa lada chem ya kiwa em kiwa leh thurmur næ yaleh pyrchah wow tyngkheiñ ya ki kyndon wa da phah, ka sorkar ym ap ko lada toh ki sahep sorkar næ ki bru paidbah, wei daw pynchitom katkam ka aiñ hadooh wow kset patok.

Da pyntip u wa kini ki bru, hadien wa wan ki naka khawai ha Greenwood Resort da pynman leh yaka khawai khian sa ha Shillong.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

U Tynsong da pyntip u wa waroh ki 41 ngut kiwa lai cha ka khawai chongkurim da booh ha Quarantine Centre, wei ka sorkar da phah ko leh wow pynbna paidbah, lada em kiwa yachem næ yajan wa kini ki 41 ngut wei wow pyntip ki wut wut cha ka sorkar deiwa Phone ha u Number 108 khnang wow leh ya iwa emkaam.

Da ong u wa napyrdi kini ki 41 ngut 2 ngut da yoh COVID-19 ki, tangwa ka sorkar ym chim stiñ ko wei ha kini ki chi sngi næ ar sngi daw Test biang ya ki waroh.

Haka hukum wa pynmih daka District Magistrate ka East Khasi Hills haka 5 tarik uni u bnai, da ong wa heiyatoh wa i yoh COVID-19 u wakreh ka Greenwood Resort, Khanapara uwa da pyntikna haka 25-06-20 heiwa da em leh ka khawai bia ha kani ka jooh ka thaw haka 27 tarik kawa da wan wow chimbynta lang da kiwa hayung hasem kawa bia deilang wa kiwi kiwa na East Khasi Hills.

Da pyntip wa da yoh ya ki 5 tylli ki Online Interstate Pass Application kiwa da e cha kawa bia wa cha ki 4 ngut kiwa chong chnong ka Shillong ka wow pynemkaam chisien donhi wow em uwi hapoh ka kari tangwa hadien wa booddien da chem wa da em 27 ngut kiwa na Shillong kiwa lai cha kani ka bia.

Kamtæ da phah yaki MCS wow pynman ki yaka takit wei wow e yaka Report ynne ka sngi.