Ka Umsalait SC da yoh ko wow psiah Final deiwa jop ya ka One Soul Utd (Pdengkarong) da 5-1 ha ka Semi Final wa ar yong ka 9th Secondary School Football Knock-out Tournament 2022-23 wa da pynman ha Madan Pdengshakap ha ka 18 tarik.
Hapyrdi i yalehke, ka Umsalait SC da yoh ko u thap kool nyngkong haka minit wa 7 lyngba u Arnes Marwein, u Phrangki Buam da thap u samen le kool haka minit wa 37, 44 wa haka minit wa 63 neitæ pynbood sa u Bhaki Rymbai haka minit wa 87.
Ya ka chi kool won yong ka One Soul Utd (Pdengkarong) da thap da u Marshial Nongrum haka minit wa 73 heiwa ka yalehke da neh ko da 5-1 hadooh wa kut i por.
Kamtæ ka Final yong kani ka Tournament u man ko hapyrdi ka Tariang FC pyrchah ya ka Umsalait SC haka 1 Naitung (April) heipor 1:00 i sngi.
