Jowai: U Dr. DD Lapang uwa jooh man kam u montri rangbah ka jylla la san sien, ynne ka sngi da psiah u cha ka National People’s Party (NPP) heiwa da emlang u montri rangbah ka jylla u Conrad K. Sangma, u symbood montri rangbah u Prestone Tynsong, u montri ka C&RD u Sniawbhalang Dhar, NPP State President u Dr. W.R. Kharlukhi wa kiwi kiwi ha ka yalang paidbah wa pynman ha Nongpoh, Ri-Bhoi District.
U Conrad hawa pdiang u ya u Dr. D.D. Lapang cha ka party da ong u, “I psiah u Dr. Lapang cha ka NPP daw pynkhlan chooh chooh ko ya ka Party neidaw wa u Lapang da man u u bru wa chemphang wa stat wa sian ha ki kaam saiñ hima wei u man ko leh kam chibynta wow pynku pynheh smat ya ka Party hapoh ka Meghalaya wa ka thaaiñ mihsngi.”
U Conrad da klam u yei ieh bieñ ka Congress ya u Lapang cha rood hadien palat 50 snem wa da e chkari u hapoh ka jylla khlem pynyoo yei sñiawngooh ya oo wei ini i pynemkaam tæ noh ka Congress kat ya u Lapang pyrkhat hadooh katwon won u leh ki ya ki bru paidbah.
U Conrad da ong u leh wa hapoh ka NPP burom ki ya kiwa da heh da sian ki dkhot wei da khana u leh wa u MLA na Arunachal Pradesh sñiawskhem u waka thaaiñ mihsngi ka NPP ye ko wow yaklam waka sorkar pyrdi.
“Ka NPP katni da sakhi ko yei pdiang ki bru ya ka ha waroh kawi ka thaaiñ mihsngi. Wei kular O ya phi wa haki snem wow wan ka Party daw heh daw khlanbor chooh chooh ko. Kani ka Party toh kawa em ka thong wow kreh neibynta ki paidbah,” da ong u Conrad.
Kam wow pynkynmoo u Lapang da mih u naka Congress Party ha ka 14-09-18.
U Lapang hei klam yong oo da ong u, “Nga u sdang O ya ka luti wa thymme hei kreh yong nga. Da em O kattu la 50 snem ha ki kaam saiñ hima sima wei da chkari O ya ka Nongpoh Constituency la 40 snem ha kiwa boon ki liang. Ynne da yoo O wa emkaam wow lai katkam ki por wei nga sñiaw biang O wa kani ka luti wa khaddooh yong nga ha i chakri paidbah wow emlang O waka Party kawa ye u kreh wa kawa pdiang da ki paidbah ka Meghalaya.”
U Lapang da kynmoo tympang u ya u tynde u Purno Agitok Sangma uwa da man u kam u dieñbah heiwa ki soo ngut ki khon u, le ngut da em ki ha ka kaam saiñ hima sima kiwa man kam ki chnat dieñ kiwa thrang wow kreh neibynta ki paidbah.
“U Conrad Sangma toh u khon uwa yahkhmat ya ka ri wei ha i kti yong oo ka Meghalaya em ko ka mynried wa tychaaiñ.” Da ong u.
Da yaroh u leh ya u P.A. Sangma ya ki kaam wa da leh u neibynta ka ri deiwa ong, “Oo man u u bru wa chynna jngai, uwa em ka thong waka raikut. Yeiwa da ye u leh ha ki kaam saiñ hima daw thoh ya ki da ki dak ksiar wei kiwa da ieh u ha i lai luti u daw kynmoo bait ya ki.”
Discussion about this post