Psiah u HDR Lyngdoh deilang wa kiwa kyrchaan cha ka UDP

Ka United Democratic Party (UDP) da nang pynkhlan ya ka ha Sohïong Constituency deiwa pdiang burom ya u MLA warim yong ka Congress na katai ka Constituency, u HDR Lyngdoh ynne ka sngi deilang wa kiwa kyrchaan ya oo.

Hawa klam ha ka yalang, u HDR da ong u wa kiwa yahkhmat katni wa kynthup ya u MLA wa u MDC ym toh ki yong ka UDP, tangwa kiwa em du ka reiñ wa len wei lada yadaw heithaw u takha, booid pathan dei booid wei ki paidbah da ngiah ki ya ka khleiñ wa da thang heipor wa kwah ya i kaam.

Da ong chooh chooh u wa ki paidbah da ngiah ki yei kyrchaan ya ki seiñ rithor (National Party), wei da pynjæd ki ya ka seiñ Congress wei oo leh da ngat lang, tangwa katni da wan yah sa da kawi ka National Party, ka NPP. Da ong u wa ha ka NPP ka chongchit toh du kiwa yahkhmat ym toh ki paidbah.

U Lyngdoh da ong u leh wa ym em i artatien wa ki paidbah daw kyntait ki leh ya ka NPP kawa man ka seiñ wa yalam katni ya ka sorkar, wei ki daw kyruiñ ki khmat won cha ka seiñ UDP kawa em i kyrmen neibynta ka mynried ka jylla.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Ha kani ka sngi da sakhi yei tooid ki paidbah da ki hajar ngut ha katai ka yalang, heiwa da emlang leh kiwa yahkhmat ka UDP wa kynthup ya u President, u Metbah Lyngdoh, u General Secretary, u Jemino Mawthoh, u Paul Lyngdoh, u Titosstarwell Chyne wa kiwi kiwi.

Hawa klam ha kani ka sngi u Metbah da ong u wa ka UDP ymtoh ka Party kawa kwah wow pynpiah pynpra yei ya tylli yong ka yung ka sem du neidaw ka saiñpyrthai.

Da ong u wa ka UDP ka kyntu ko ym du ya kiwa yahkhmat tangwa wot ya ki paidbah wei ki ym toh u e laad ki u pynpiah pynpra ya ki manyung mansem du neidaw ka Politics. Ini i klam yong u Metbah toh hadien wa kiwa hayung yong u HDR Lyngdoh da yakhun pyrchah ki ya oo ha u 2018 deiwa lai kyrchaan ya u Samlin Malngiang, tangwa katni won da wan uiñ biang ki wow kyrchaan ya u payu yong ki.

Ha kani ka yalang, u Metbah da ong u leh wa kam ka UDP kawa man ka Party Ri-loom kawa da slem bha boonsien da jooh rah ko ya ki phang neibynta wow wanrah noh yei yatylli hapyrdi ki Party Ri-loom. Tangwa hawa poi cha i yaklam neibynta katai ka bynta, ym jooh poi cheiwon cheiwon leh wot hadooh katni wei khaddooh i kaam da sahteiñ bait kamjooh.