Shillong: U President warim ka BJYM kawa man leh ka chnat Youth Wing ka BJP ha kani ka jylla, u Egenstar Kurklang, ynne ka sngi da psiah u cha ka UDP deilang wa kiwa kyrchaan yong oo ha ka yalang pdiang sñiawbha da u President ka UDP, u Dr. Donkupar Roy, u General Secretary u Dr. Jemino Mawthoh, u President ka UDP East Khasi Hills u TW Chyne wa kiwi kiwi.
U Egenstar ye u wow yakhun MDC na UDP na Nongkrem ha kani ka kynti neibhah wa ka UDP ym pu em pynbna kyrtong ko wei da pynyoo dak ko ya ini.
Hawa klam ha kani ka yalang, u Dr. Donkupar da kyntu u ya u Egenster wa kiwa bood yong oo, wym toh u pyrkhat ya kayi kaya cha jngai wei emkaam chwa wow pyrkhat u kreh chitom katni khnang wow poi cha ka thong.
U Dr. Donkupar da ong u wa i wan u Egenstar man ko ka spah ya ka UDP neibhah wa em u yei sap. Da ong u leh wa lada kwah wow chakri ya ka jaitbru toh u em ha ka Party ri-loom wei i wan yong oo man ko kamwa uiñ yung biang.
Da ong u wa hawa kreh ya ka Party, em kiwa kwah wow yaleh Election wei em kiwa ym em kwah wow yaleh Election tangwa manda em hi ha ka Party toh u kreh chitom yow yoh yei jop.
Neiliang u Egenstar da ong u wa i psiah cha ka UDP ym toh wa em kiwon kiwon wa pynbor næ wow myntoi, da wan u deiwa suk mynsien wei wow chakri.
Da ong u wa ka Party kawa oo kyrchaan nyngkong u toh ka UDP kaba yahkhmat da u (L) BB Lyngdoh wa mihkhmat ya ka Lyngkyrdem Constituency heiwa u pa yong oo toh uwa kyrchaan bha ya u Lyngdoh. Da ong u leh wa da u mih u na ka BJP da i burom wei da wan psiah u cha ka UDP dei burom.
Da pyntip u leh wa da em kiwi ki Party kiwa wan wow khut ya oo tangwa ym bien u neidaw wa yoo u wa ka Party kawa biang tam toh ka UDP wow yada yei man kyrpang ka jaitbru.
Discussion about this post