January 23, 2019

Pyrchah ka KSU Laskein Circle yei chna yung skur ka Diphu Diocese ha Mowluber

Jowai: Ka KSU Laskeiñ Circle hapoh i yahkhmat u President u Balawan Suchiang, Assistant General Secretary u Garland S Manner hei emlang u President yong ka KSU Jaiñtia Hills District u Ohibait Dkhar da lai booh dorkhat ki ha u Deputy Commissioner ka West Jaiñtia Hills District ynnin ka sngi wow pyrchah joor hajrong i chna ka sorkar Assam ya ka yung skur lyngba ki jait seiñ niam ha ka chnong Mowluber Block 1, lyngba ka Diphu Diocese West Karbi Anglong District Assam hei heh i thaw kamwa 42,000 Sq.ft.

Neiliang u DC da pyntip u wa da phah u ya ki Migistrate yow pynman ya ka takit heiyatoh wa ini i kaam.

Ka seiñ da pyrchah joor ko wei da sñiaw phylla wa kammon ka sorkar Assam ye ko u wanrah ya ki kaam pynroi hadien wa ki ar tylli ki jylla da chim ki ya ka rai wa ym wanrah ya ki kaam pynroi katwa ym pu pynbait ya u pood u ang.

“I ym chah i wow pynkreh da kammon kammon leh ya kani ka yung skur neidaw wa ka Mowluber dang em ko hapyrdi ka khajia pood (Disputed Area) hadooh katni,” da ong kiwa yahkhmat ka seiñ.

Ka seiñ da pynsñiaw ko ha khmat u DC wa ha i lai sylli wa dang leh ka seiñ ha ka 19 tarik da yoh ki wow yaklam wa u waheh chnong yong ka chnong Mowluber uwa da pyntip wa boon boon sien neiliang ka chnong da dep lai ki cha Diphu, West Karbi Anglong District wow pyrchah joor ya i thmu wow pynyeiñ ya kani ka skur wei neiliang ka chnong da dep ko wow yaklam markhmat wa u Phadar wa pynkreh ya kani ka skur yong ka Diphu Diocese tangwa ym poi cheiwon cheiwon leh i yaklam.

Heijooh i por ka KSU ka kyntu joor ko ya ki bor District wow pynbait noh smat ya kani ka kaam khnang wa ki para doh para snam yong i ym syier mynsien ki ha i chah pyndik ha ki bor yong ka sorkar Assam.

Ka seiñ ka klam ko da iwa che cha ka sorkar Meghalaya wa lada ym ye ko u yada ya ki paaid khappood yong i, ka sorkar toh u e ko cha ki dkhot ka seiñ da ki tiar yaleh yow yada ya ki paradoh para snam.

Ini toh katkam wa pyntip u President KSU Laskein Circle u Balawantei Suchiang.