Pteiñ ka Mookyndur wa ka Wahiajer u jop ha ka Independence Cup 2017

Jowai: Ka Independence Cup U-16 ynne ka sngi da pteiñ biang ya ka heiwa da pynman le tylli ki yalehke heiwa ha ka wa nyngkong ka Mookyndur da pynrem ko ya ka Panaliar da 2-0. Da pynjop ya ka Mookyndur da ki kool na u Pynbiang Ryngkhlem ha ka minit wa 48 wa u Wanbiang Phawa ha ka minit wa 60+1. Ka Panaliar kattu da rem ko la arsien katwa ka Mookyndur da jop ko la arsien.

Ha ka yalehke wa bood won ka Wahiajer da pynrem ko ya ka Chutwakhu da 1-0. Ya ka kool da thap da u Cheilang Laloo. Ka Wahiajer kattu da jop ko arsien katwa ka Chutwakhu da jop ko chisien wei da rem ko leh chisien.

Ha ka yalehke wa khaddooh ka hapyrdi ka 7 Wasa wa ka Lumpariat da kut ko mar chi kool heiwa ya ka 7 Wasa da thap kool u Heiniwandaoo Lato ha ka minit wa 49 katwa ya ka Lumpariat da thap u Arwat oo Sukhlain ha ka minit wa 58. Ka 7 Wasa ha waroh artylli ki yalehke da kut ki ha i ya drawn bait katwa ka Lumpariat da jop ko chisien wei da ya drawn ko chisien.