Ka Meghalaya da pynkut ko ya ka yalehke wa khaddooh kawa man leh kawa ynru ha ka Plate Group ka Women’s Senior One Day Trophy deiwa jop 12-Run ya ka Arunachal Pradesh ha Kolkata ynne ka sngi.
Deiwa jop soo sien wei rem ar sien, ka Meghalaya da yoh ko hei wa le ha ka Group yong ka.
Ka Arunachal da jop ko ya ka kylla khlem wei da jied ko wow kawang bol nyngkong chwa. Ka Luiza Tamang (kawa em hei dur) da lehbha ko da ka Bat deiwa yoh 48 Run kam kawa Bat nakhmat. Ki 48 Run yong ka da mih ki na ki 70 bol wa kynthup ya 8 tylli kiwa poi cha poi cha baar u pood.
Sa kiwi ki arngut kiwa da yoh mar 21 Run toh ka Guest Player ka Vaincy Chaudhary wa ka Captain ka Daiaka Warjri- tangwa ka Meghalaya da chem chitom ko hei kawang bol ka Mai Mekh (5/25) heiwa da haap lut ki Wicket deiwa kamai 127 Run.
Kiwa kawang bol ka Meghalaya da ye ki wow leh yei kaam yong ki deiwa ye u pynhaap lut ya ki Wicket ka Arunachal da 115 Run. Ka Arunachal ha iwi i por da yoh ko 50/5 tangwa i kamai lang wa 52 Run da jan pynjop ko ya ka Arunachal tangwa hadien wa yoh yei Run Out wa leh da ka Chaudhary da wailad ko ya ka Meghalaya heiwa kiwi kiwa Bat ka Arunachal da ye wow pynhaap smat ki.
Waroh da em 4 tylli ki Run Out wei kiwa yoh u pynhaap Wicket toh ka Ajima Sangma 2/20 na ki 9 Over, ka Rebeldalis Syiemlieh (1/8), ka Deiphibapynshngain Lyngdoh Mawnai (1/12), ka Sandria Momin (1/12) waka Warjri (1/16).
