Shillong: Ka Congress da pynbaad ko wa ka sorkar leh ko kam ka wym bna yei eh ki paidbah kiwa maad yei chlai um, heiwa ym em phah ya i yarap cha kiwa chong chnong kiwa da chah ktah nei joor u slap ha ka jylla.
Hawa klam wa ki laad pathai khubor ynne ka sngi, uwa yahkhmat ka Congress u Zenith M Sangma da ong u wa hadien wa joor u slap, ki them yong ka Garo Hills leh da chah ktah ki ha i chlai um neidaw ka Wah Bramaputra, wei ini i chlai um da ktah ko ya palat chilak ngut kiwa chong chnong ha ka thaaiñ Garo Hills
U Zenith M Sangma da ong u wa palat chilak ngut ki bru kattæ da em ki ha sarok na ini i wan ka um na ka Wah Bramaputra cha Garo Hills, tangwa iwa sñiawsih toh wa sorkar hadooh ynnin ka sngi ym pu e ko ya iwon iwon i phah e yarap ya kiwa da chah ktah ha ini i chlai um. Da ong u wa ini i chlai um ha ka jylla da pynoor ko leh ya kiwa boon ki bynta yong ka West Khasi Hills wa kynthup leh ya ki sarok.
Da pyntip u leh wa ha i lai sylli yong uwa yahkhmat ka liang pyrchah da phah ya ki bor pynlai District wow yarap smat ya kini ki bru kiwa da chah ktah nei chlai um katkam i bor wa em ki, ym toh wow yang hadooh wa yoh i phah na ka sorkar.
U Zenith da ong u, hawa em iwon iwon i chah ktah hei bor ka rymaw, ka sorkar toh u e yarap wut wut ya kiwa chah ktah khamtam dooh wow yoh ki yaka umdih kawa khooid yow lait ki nei kjut.
