Ka Hill State People’s Democratic Party (HSPDP) da pynbna ko ya 7 ngut ki kyrtong ha ka thup wa nyngkong neibynta wow yakhun ya ka Election MLA 2023 kawa daw man ym slem de. Ki kyrtong kiwa ka HSPDP da pynbna ko toh du ha ki Constituency kiwa em ha Ri-Bhoi, West Khasi Hills, South West Khasi Hills wa Eastern West Khasi Hills.
U Witting Mawsor uwa man u Chairman ka Election Committee da pyntip u wa ki kyrtong toh ha Mawhati wow pynyakhun da ka Evalyne Kharbani, u Primson Makdoh na Umsning, u Shakliar Warjri na Mawthadraishan, u Sanjied Kynsai Khongsit na Nongstoin, u KP Pangniang na Rambrai, u Methodius Dkhar na Mawshynrut wa u Medalsing Lyngdoh na Mawkyrwat.
Neiliang u Mawsor da khana u wa ka Party daw pynbna biang ko ya ki kyrtong ha ka thup wa ar ha kini ki kajiak sngi wow wan, wei da khana u leh wa ka HSPDP em ko i thmu wow booh kyrtong kamwa 10 hadooh 12 ngut ha kani ka Election.
Hawa kylli, u President ka HSPDP, u KP Pangniang da ong u wa ka Regional Democratic Alliance (RDA) toh ka dhab wa emlang ka UDP dang im ko, tangwa ka yakhun won ya kani ka Election toh jar jiar wei ka RDA daw man ko kawa ya krehlang hadien yong ka Election ha kani ka kynti.
