Shillong: U Chief Executive Member (CEM) ka Khasi Hills Autonomous District Council (KHADC), u Titosstarwell Chyne ynne ka sngi da wanrah u ya ka mang tyngka kawa 3 bnai hapoh ka KHADC kawa man T. 81.21 klur ya kawa da pdiang da ka yung dorbar khlem iwon iwon i yaklam.
Ka mang tyngka ka KHADC wa da wanrah ha ka dorbar kyrpang wa chi sngi da man ko neibynta i krehkaam wa 3 bnai ha ki 9 tylli ki chnat krehkaam ka Council, ka wow kynthup leh heiwow su ya ka tulop ki wakreh, nadooh ki Executive Member, Chairman, sahep wa kiwi kiwi.
Hawa wanrah ya kani ka mang tyngka ynne ka sngi, u Titos da ong u wa i wanrah ya kani ka mang tyngka ka wow kreh nadooh ka 1 Naitung (Apr) hadooh ka 30 Naiynru 2020, wei wow pynlait poisa noh cha ki chat krehkaam wow ye ki u kreh ha kini ki 3 bnai, katwa ya ka mang tyngka wa pura daw wanrah ha ka dorbar ka wow wan.
U CEM da ong u wa i mang poisa ha kini ki 3 bnai u kynthup i ya ka General Administration Department T. 10.59 klur, ka Law Department T.1.84 klur, Revenue Budget and Finance Department T. 2.04 klur, Forest Administration Department T.1.12 klur wa kamjooh neibynta kiwi i emkaam.
Ha kani ka dorbar mang tynga, u Titos da pynbna u leh wow pynlait kyrpang ya ka poisa cha waroh ki MDC T. 10 lak samen wow pynemkaam neibynta wow yada nei poor ka khlam u COVID-19, deiwa kyntu leh ya ki MDC wow e sñiawbha ki katwa ye wow yakhun pyrchah ya uni u khñiang uwa da ktah ya ki ri ha ka pyrthai.
Hawa klam hadien wa da kut ka dorbar, u CEM ka KHADC da ong u wa i chim rai wow pynlait ya ka poisa T. 10 lak cha waroh ki MDC wow yarap ya ki paidbah ha ki Constituency kiwa chem chitom kam ha kini ki por.
Discussion about this post