Ka seiñ kiwa kamai kari na Assam wa kyntup nadooh ki kari Tourist, ki Bus deilang ki Truck kit mar wa kiwa kit phniag hapoh ka lama ka Motor Praivan Sewakarmi Sanmilita Mancha da beiñ ki yei yeiwa chah khang ki kari kiwa em Number Assam wow lai cha ki thaw uiñke suwari wa em ha Meghalaya deiwa ong wa kini ki kari toh kiwa em ya ka Permit wow lai cha Assam, Meghalaya wa Arunachal Pradesh wei em leh kiwa em hadooh ka All India Tourist Permit.
Da ong wa ynne da sdang i chah khang ki kari wa lai cha ki thaw uiñke suwari ka Meghalaya wei da chah pyndik leh ki bru wa kit hapoh kari wei lada pteiñ ini daw sangeh wot yei lai booh bru cha ka Shillong ISBT kamjooh ki Hotel wei da khut syndon wow pynman da ka Total Non-Cooperation nadooh 5 waje i step ka 18 tarik uni u bnai hadooh wa pynbna da kamwi wei ini daw ktah kylla ko ya ki kari kiwa na Meghalaya kiwa daw chem chitom wow lai kit bru na Guwahati Airport kamjooh na Railway Station wei ini daw pynduna ko leh ya kiwa uiñke suwari kiwa daw wan.
Chooh chooh da ong wa manda duna kiwa uiñke suwari daw ktah ko leh ya kitu kiwa dai baam, kiwa dai mar, ki thaw sah, kiwa kamai kari, ki Petrol Pump, ki Toll Gate, kiwa khrong bai pynyieñ kari wei manda poor bha kani ka khubor ha ki Social Media ha kylleiñ ka ri daw thut lut waroh ki kaam uiñke suwari iwa daw neh deiwa slem bha.
Da e nongmuna leh wa pyn da kattæ da boon kiwa da dam u lai cha Meghalaya wei da jied ki wow lai cha kiwi ki thaw kam ka Arunachal Pradesh, Nagaland, Uttarakhand, Himachal Pradesh, Bhutan, Leh-Ladakh wa kiwi de.
Kamtæ da ong wa ki kaam uiñke suwari ym em man ko du neibynta kawi donhi tangwa deiwa ya krehlang da waroh kam nadooh ki phaw snem nachwa nadooh ki Hotel, ki Homestay, ki Guide, ki Restaurant, ki tre dukan nadooh na Byrnihat hadooh Dawki, Jowai, Shillong, Sohra wa kiwi de wei du deiwa kwah da ki kattu katni wow baam jem, ini waroh daw sepai i.
Discussion about this post