Shillong: Ka Central Election Committee (CEC) yong ka UDP da pynbna ko ya u Dr. Jemino Mawthoh kam u kyrtong wow yakhun ya ka Election MP na Shillong.
Hawa yaklam hadien ka yalang ka CEC, u Vice-President ka Party, u Allantry Dkhar da pyntip u wa i rai ka Party ya i pyrtuid u General Secretary wow man kam u kyrtong MP toh hadien wa da em ka bichaar wa i pan yumut na ki wakreh ka Party ha ki District.
Ka UDP da hap ko wow jied uwi napyrdi kiwa yahkhmat ka Party kiwa da paan Ticket wow yakhun ya ka Election MP, kitea hapyrdi u Working President u Paul Lyngdoh wa u GS u Jemino Mawthoh wei hadien ka yatai ha ka yalang ka wym em kini ki ar ngut ka Party da rai ko wow e Ticket cha u Dr. Mawthoh.
U Allan u da ong u wa ya i pyrtuid u Dr. Jemino daw rah leh ha ka yalang ka sorkar synrop MDA wow jied kam u kyrtong hunlang ka sorkar.
Heiyatoh won i thmu kiwi ki Party wow pynyieñ ya u kyrtong, neiliang uwa yahkhmat ka UDP da ong u wa ki em ki ka hok wow pynyieñ ya u yong ki hi u kyrtong, wei emkaam ki leh wow pyntipmit ha ka yalang ka MDA.
Discussion about this post