Ka Jaiñtia Students’ Union (JSU) ynne ka sngi da pynbna ko wow pynman dei yakhih deiwa chong kyllaiñ myngngor ha laad Kiang Nangbah Government College heipor 11:00 waje i step ka 28 tarik uni u bnai (May). Kamtæ ka seiñ da khut da kyrpaad ko ya waroh ki khynnah ki wym pu yoh thaw puræ Class-XI deilang ki bei ki pa yong ki wow ya wan chimbynta khnang wa ka yakhih u man ko kawa jop.
Ka JSU da kyrpaad ko ya ka sorkar wow chimkhia yeini wa dooh thaw puræ ki khynnah hapoh Ri-loom Jaiñtia neidaw wa boon na kini ki khynnah toh kiwa wan na ki yung wa dooh wa duk.
Ka seiñ da pynkynmoo ko leh wa dang ha kani ka tayaaw wa dep da yoh ko wow yachem wa u Chief Minister, u Conrad K Sangma uwa da kular wow pynbait ya ini i kaam deiwa e buit leh kammon wow pynbait ya ini i kaam deiwa booh leh ya ki Evening wa Morning Section ha Kiang Nangbah Government Higher Secondary School wa ka Morning Section ha ka Government Boys’ Higher Secondary School tangwa ka sorkar ym em chimkhia ko yeini.
Neiliang ka seiñ da ong ko wa lada ka sorkar em ko da kiwi ki luti wow leh yow pynyoh thaw puræ pdiang hi ko tangwa ym em won leh ko iyi iyi leh.
Discussion about this post