Hadien wa mih boon i khñium wei ood na ki paidbah heiyatoh wa i dai ya ki Ticket neibynta ka Semi Final ka Durand Cup wa daw pynman hapyrdi ka Shillong Lajong FC waka North East United FC, neiliang ka chnat Sports and Youth Affairs ka sorkar Meghalaya da phah ko yei pynche.
Da ong wa ka J.N. Stadium kawa man kam ka Multipurpose Stadium toh kawa em 15,000 tylli ki thaw chong. Wei da hap leh wow bood ya ki kyndon yalehbol katkam wa da booh deiwa pyrkhat nadooh i chngaaiñ ya ki paidbah kamjooh i thaw wow booh ya ki Advertisement kiwa Sponsor, kamtæ ki nyngkong dooh ki 4 line ki thaw chong ha North/South Stand wa ki ar tylli ki line ki thaw chong ha ka East Stand da ieh ki khlem dai. Wei ya kini ki thaw chong da booh deiwa pyrkhat manda em kiwi ki jait yalehke kam ki Athletics yow chynna bha ki bru.
Da ong leh wa da yaleh katwa ye wow pynyoh Ticket neidaw wa boon kiwa kwah u thied bar ya iwa em Ticket. Da booh bhah leh du kattu katni neibynta ka Durand Cup Organising Committee wei da em leh ki Ticket wa da booh neibynta kiwa Sponsor katkam wa da ya mynjur chwa wei neibynta ka Shillong Lajong FC wa NEUFC da yoh ki mar 100 tylli ki Ticket katkam ki kyndon.
Ka sorkar da kmen ko leh wow yoo yei chongchit mynsien ki bru wow thied Ticket hadooh wa lut plak. Wei da pyntip leh wym chah wow dai ya kini ki Ticket kiwa dadep thied wei lada chem daw pyntip cha ki pulit ka Meghalaya. Waroh ki Ticket toh kiwa em Hologram yow pyntikna wa du ki Ticket wa yong sakhiat donhi ki wow yoh u psiah. Kiwa thied Online hap ki wow lai chim ya Ticket ki na ka Box Office wa em ha U Soso Tham Auditorium ha ka 25 tarik chwa ka 6:00 waje i janmiet.
Da pyntip leh wym chah ya kiwon kiwon ki wym em Ticket wow wan ki cha ka Stadium ha ka 26 tarik hadien ka 12:00 waje i pyrdi sngi.
Deiwa pyrkhat won ya kitu ki wym yoh Ticket, da booh da ki Fan Parks ha kylleiñ ka Shillong wa ha kiwi ki District wei ki paidbah ye ki wow lai cha kini.
Kini ki Fan Parks toh kamni:
1) Malki Sports Ground, Malki
2) Madan Saw, Golf Links
3) Madan-Heh Ground, Mawlai
4) Police Point Parking Lot, Laitumkhrah
5) Umpling, Mawarliang
6) Madan Daimasi, Ladthalaboh, Jowai
7) Pahamsyiem Ground, Nongpoh
8) Patharkhmah Hr. Sec. School, Patharkhmah
9) Nongstoin Playground, Nongstoin
Najrong kini daw pynyoo leh ya kani ka yalehke ha ki Screen ka DIPR wa em ha Police Bazaar wa PHC, Rynjah.
Da pynkut deiwa ong wa ka sorkar pyrkhat bha ko yei bha i miat kiwa wan paitke kamjooh yow lai bait ka yalehke, kamtæ da kyntu ya ki paidbah wow bood ki ya ini wa da pyntip ka sorkar.
Discussion about this post