Neiliang ka chnat Education ka Meghalaya, da ong ko wa ka sorkar jylla da pynkrehkaam ko ya ka “Meghalaya Non-Government School and College Employees Centralised Provident Fund Scheme, 2026” da ka thong wow pynskem ya ka poisa poiliañ wei wow yada ya palat 30,000 ngut kiwa kreh ha ki skur wa ki College ki wym toh ki yong ka sorkar wa em ha kylleiñ ka jylla.
Da ong wa kani ka Scheme toh kawa kongsan bha wei ka wow pynkylla dur ya ki kaam puræ puthi neibhah da em ko ya ka Provident Fund wa ki myntoi na ka Pension neibynta kiwa kreh wa kynthup nadooh ki Deficit Teacher, Lecturer, Adhoc Teacher, SSA wa RMSA Teacher deilang ki Hindi wa Science Grant Teacher, Pre-Primary Teacher chirup wa kiwa man kam ki Non-Teaching Staff.
Wei deiwa wanrah da waroh ini ya kiwa kreh da man ko kawi kawa kduplang ya waroh khlem da leh chiliang, deiwa khooid wei kawa ye u neh slem.
Da ong leh wa kiwa boon kiwa kreh dadep ki wow ya mynjur ya kani ka Scheme, wei i wai ya ka Permanent Retirement Account Numbers (PRANs) toh kiwa da sdang ha kiwa boon ki bynta ka jylla.
Heijooh i por da pynche leh yei sñiawkhia kiwa boon kiwa kreh wa em ha ki thaw puræ wa man kam ki Deficit, deiwa ong wa dang em kani ka kaam hei bichaar ka High Court ka Meghalaya, wei ka sorkar da booh leh ya kani ka Scheme wa da mynjur ha ka High Court wei dang yang yei rai.
Ka sorkar jylla da ong ko wa man ko kawa da raikut wow pyrkhat yeiwa emkaam ki waroh deiwa yoh myntoi warohlang. Kamtæ ka Education Department da khut ko ya kiwa mihkhmat na ki seiñ waphær waphær yow thooh ki laad yow pynbait yeini i kaam. Da pyntip wa ya kani ka yachemlang da booh u pynman ha ka 6 tarik uni u bnai heipor 3:00 waje i sngi ha Main Conference Hall, Secretariat.
Discussion about this post