Jowai: U MDC ka 7-Nangbah Constituency u Shemhok Garod da pynche u hajrong i mih khubor pyrchah ya oo wa pynemkaam bakla u ya ki MDC Scheme.
U Garod da ong u waroh ini ym toh wa sakhiat wei man ko du wow phareb ya ki kaam wa oo da leh u neibynta ka Constituency u. “Hei yong sakhait kini ki bru wa da leh RTI ya waroh ki scheme kiwa nga da e O ha kani ka san snem wa nga da kreh O kam u MDC, neibhah wa waroh biang i nadong chadong wei ki ym yoh daw ki da kamwi won kamtæ da thooh laad ki wow pynboodnaam da ini i pynbaad ki.” Da ong u Garod.
Chooh chooh da ong u wa ini pynbaad ya oo ym em man i iwa sakhiat neibhah waroh kat kiwa da mih pyrtuid kiwa em ha ka List kiwa yoh myntoi na ka MDC Scheme da yoh lut ki, lait noh ki kattu katni kiwa hadooh katni ym em wan chim ki, neibhah ya kitu kiwa ym pu em wan chim, oo da booh yukhein (Record) ha ka Register deilang wa i soi pyrtuid (Signature) yong ki hi.
Kamtæ u MDC da kyrpaad u ya ki paidbah yong ka 7-Nangbah MDC Constituency wym toh u chah yah bakla ki ha ini i phareb wow pyndooh burom ya oo deiwa kyrpaad leh wa kiwon kiwon kiwa kwah wow yoh u tip ya iwa sakhiat ye ki u wan yachem wa oo wei smat u wow yachem yow pynche wow batai ya waroh i kwah yong ki.
Also Read: Chah pynbaad u MDC ka Nangbah Constituency wa pynemkaam bakla T. 17 lak ka Scheme MDC
Discussion about this post