Jowai : Kani toh i pynche na u Waheh Chnong ka Mihmyntdu hajrong i chah pynbudnaam wei kynnoh wa oo emkti u heiwow pynemkaam bakla ya ka scheme Total Sanitation Campaign (TSC) da ki le seiñ kiwa kynthup ya ka KJNU, MPUF wa ka AHPUF.
Neiliang u Waheh Chnong u ma Lakhon Ryngkhlem da ong u wa oo ymtip u ya waroh ki scheme waphær waphær wa poi ha ka chnong neibhah ya ka chnong Mihmyntdu da yabhah ya ka katni ha 8 tylli ki dong wei da thung leh ya ki jar jiar ki Waheh Dong, ki Secretary Dong wa ki Member ka Committee Dong ki wow pyllai ya kiwon kiwon ki scheme wa wan hapoh ka chnong Mihmyntdu wei kiwa kitkaam dong katni da man dkhot ki ha ka Village Water Sanitation Committee yow pynkrehkaam ki ya ka scheme paikhana (TSC).
Chooh chooh waroh ki Dong da wai Account ki yong ki hi ha ki Bank kamtæ neiliang ka poisa poilaiñ u Waheh Chnong ym em kti de u.
Kamtæ, i kynnoh wa u Waheh Chnong baam sap u toh iwa khlem em nongrim wei ym ye leh u pynsakhiat wa u Waheh Chong wa kiwa kitkaam chnong emkti ki ha ini waroh.
Kani toh katkam ka khubor wa pyllait da u Waheh Chnong ka Mihmyntdu u ma Lakhon Ryngkhlem.
Discussion about this post