Shillong: Ka yalang hapyrdi ka sorkar Meghalaya Democratic Alliance (MDA) wa ki MDC ka Khasi Hills Autonomous District Council, kamjooh kiwa synchaar chnong hapoh ka lama ka Synjuk ki Nongsynshar Shnong ka Bri Hynniewtrep da chim ki ya ka rai wow dam noh u pynkrehkaam ya ka aiñ chna yung ka Meghalay Urban Development Authority (MUDA), wei wow pynemkaam noh katkam ka aiñ ka KHADC.
Hawa yaklam hadien kani ka yalang, u Conrad Kongkal Sangma da ong u wa ka sorkar daw pyndam noh ko ya ka Building Byelaws ka MUDA.
U Conrad da pyntip u leh wa ya kani ka kaam da ekti ha ka tnat aiñ wow pyndep ya kiwa emkaam katkam ka Meghalaya Building Bye Laws & Town Planning Act 1973.
Da ong u leh wa emkaam wow pait wei wow bichaar chwa wow pynkylla ya kani ka aiñ wow kynthup ya ki thaw ka KHADC lada man ko katkam ki kyndon kani ka aiñ.
U Conrad da ong u wa katkam ka Meghalaya Building Bye Laws & Town Planning Act 1973 da klam che ko wa ki thaw wa pait da ka KHADC (Scheduled Areas) ym haap ki ha ki kyndon chna yung ka MUDA, wei i pyndam ya ka rai ka sorkar MUA II toh wa ka sorkar ym yoo ko wa emkaam wow pynkrehkaam ya ka Building Bye Laws ka MUDA ha ki thaw ka KHADC.
Da ong u leh wa ka sorkar daw ekti biang ko ha ka KHADC wow chna ya ki aiñ chna yung ha ki thaw ka Council wei wow chna leh ya ki Town Committee neibynta wow pynkrehkaam ya kini ki aiñ.
Heiyatoh wa i paan ya ki Certificate psiah yung (Occupancy Certificate) da ki tnat sorkar, kam ka tnat bordiñ (MeECL) wa ka tnat um dih (PHE) neiliang u Montri Rangbah da ong u wa kani ym emkaam de wei ka sorkar daw phah ko ya ki tnat wow dam noh u paan ya kini.
Neiliang u CEM ka KHADC, u Pynshngian N Syiem da ong u wa ka yalang wa ka sorkar thymme da man ko kawa jop deiwa rai wow pyndam noh ya ka aiñ chna yung ka MUDA ha ki thaw ka Council.
Heijooh i por kiwa yahkhmat ya ka SNSBH da sñiawhun ki ya kani ka rai.
Discussion about this post