Jowai: Ka chnong Lamin West Jaiñtia Hills District kamwa jooh leh khlieh ki snem da pyndep ko yaka lehniam wa tip ka kñia Ron Shondi ha Iaw Bakur neibynta u man khih man khan u roi u paar kiwa chong dai, kiwa wan yaaw kamjooh leh u lait ki nei mynsoo mynsnaam dei wow yoh ki i chait i khiah. Ha uni u snem leh da pyndep ki ya kani ka lehniam ha kani ka 11 tarik u Khonchonglad ha i thaw lehniam wada chna kyrpang ka chnong Lamin hapyrdi yaaw.
Ha kani ka lehniam wada yahkhmat da u Waheh Chnong ka Lamin da khut ki yaka Blai Ron Shondi deiwa e ka ngooh ka dem, ki syiar ka blang yow yada ko yaka yaaw, kiwa chong yaaw, kiwa wan thied, yow ku ki hei yoh kamjooh u yoh ki i chait i khiah waroh chi lynter u snem, wei katkam ki dak ki chin wada sakhi ha kani ka lehniam yong kani ka sngi toh iwa man bha man miat.
Hadien wa da pyndep yaka kñia da yoh won i lehkmen daki chaad tynre naki khon ka chnong Lamin, wei hei janmiet won da em biang ka lehniam chwa u chim bynta ki hei ya baam ja sñiawbha yonglang.
Hei yaklam wa u Waheh Chnong ka Lamin u Golden Gashnga ong u, nawa sdang ya kani ka yaaw haki khlieh snem 1934 da jooh khut yaka kam ka yaaw Dawki hadien won da tip noh ka yaaw Bakur hapoh i pait i pyllai ka chnong Lamin katwa haap ko hapoh u pood u ang yong ka.
Da khana haroh u wa nachwa ka dorbar chnong hi jooh e ngooh e dem bait ki du neibynta ka kur Gashnga kawa da e kyrpang yeini i thaw wow pynman yaaw, suki suki won nadooh ki khlieh snem 1940 chaneiñ da sdang u pynman yaka kñia man u snem wei da man ko leh kam ka yaaw niam.
Ki kur wa ye u chim bynta won ha kani ka lehniam toh lyngba kitæ ki “Lamin Lapoh” wa kynthup ya ka kur Gasah, Gashnga, Gaiang, neite won kiwi wa ye u em wynta toh ka kur Khonglah, Pohlong, Sumer, Dhar, Tongper, Mannar, Porthmi wa kiwi nalor ki khon ka chnong ye ki u wan em bynta lang chirup u Dolloi ka Elaka Nongtalang.
U Omin Pohlong Asst Secretary ka chnong Lamin ong u kani da man ka yaaw wa em naam tam hapoh ka thaiñ khappood heiwa ki bru wan yaaw ki na kylleiñ kylleiñ nadooh na Jowai ter ter, na ki thaiñ Laitlyngkot Khasi Hills wei da pynmyntoi ko chiboon ya ki paidbah wa ye ki u yoh boonjait ki mar, seiwi ye u ong wa man ko ka International Market han lym yoh u lai u wan katwa ngait leh neibhah em kiwa chong chnong nadooh Bangladesh leh wan yaaw ki haka.
Neiliang u Secretary Tympang Khonglah ong u, i kam kiwa rap pateiñ u yaleh i wow pynneh pynsah yei yi wada sikai ki waheh wasian nachwa khnang yow ye u e i chakri wa rap biang ya ki paidbah neipor cheipor.
Discussion about this post