Jowai: Kani ka rukom lehniam Thap Chyieñ toh kawi na ki lehniam wa kyrpang yong ki khon ka Raij Lamin wei kawa pynyoo leh yeitae i man kyrpang ki bru wa chong chnong, ha uni u snem ya kani ka lehniam da pyndep da ki manyung na ka Kur Gashnga wa ka Kur Khonglah kiwa man ki manyung wa danghap u pynlum pynlang ya ki chyieñ yong kiwa hayung ha sem kiwa da yap ha kini ki sngi ki bnai kiwa dadep neibynta wow yoh u thap u booh won hei thaw wada chna kyrpang wa em ha Tpep.
Chwa wow poi kani ka sngi lehniam ki manyung nae ki khon ka niamtre wa em ha chnong Lamin dei sñiawkhia yei man kani ka sngi da mih ya chimbyntalang ki hei wow pynkhooid pynjngiar wei pynphooh pynpheiñ yei Tpep nae ki thaw booh chyieñ wa ki mot deiwa ngait leh wa ha kani ka sngi ki ma, ki woh, ki beipun beili, ki payu para kiwa da kup da kap yei kyrdan Sangia u wan ki wow embyntalang ha ka Siang ka Phur.
U waheh Juwan Lamin, Adviser Seinraij Lamin chirrup i emlang u waheh R. Lamin, Montri Lamin-Lapoh hei yaklam da khana wa ya kani ka lehniam da sdang nadooh ka sngi Pynsiñ 28 tarik Thohlakhmi heiwa ki kynthai nae ki manbei em ki ka bynta wa kyrpang hei wow chet ya ki tpu, ki baam wei pyntoh pyntne yei song i tap, ki soh ki pe wa boonjait neibynta ka Siang ka Phur katwa ki waheh wasian nae ki chynrang na man ki kur wa em hapoh ka Raij Lamin chimbyntalang ki ha ka ngooh ka dem haman ki yung wahap u pyndep ya ka lehniam Thap Chyieñ katwa ha ka sngi wa bood won ka Mulong 29 tarik dang step ki khon ka Raij Lamin na man ki yung kiwa dang bood dang ksooh ya ka niam wayah wa tyoor ki warim, yooh kjat ki cha Tpep neibynta wow pyndep ya ka Siang ka Phur næ i e baam e dih wa kyrpang ya ki Sangia-Saret.
Hei sakhi ya kani sngi haman ki yung wa pyndep ya kani ka lehniam dachem wa ki kur-ki jait, ki kha ki man wa ki lok ki jor najan wa najngai wan ki wow synranlang neitæ won hei chiteiñ sngi hei pait i pynlai ki chakri niam ki wasan waheh, ki montri wa ki Kñi yong kitu ki kur ka lehñiam sdang ko deiwa mih na yung deilang i rah ya ki baam kiwa da pynkhreh kyrpang neibynta ka lehñiam ha Tpep.
Kiwi won ki bynta yong ka lehñiam kiwa hap u pyndep hadien wa da kut ka lehñiam na Tpep toh ka lehniam Tim Shuret hei janmiet haman ki manyung wa pyndep ya kani ka lehniam Thap Chyieñ wei kat kam i sikai niam da ong leh wa kani ka lehñiam u kut ko hadooh wa dap Le sngi-Le miet.
Discussion about this post