Ki 120 ngut kiwa da pyndep yei chah sikai ha le tylli ki jait kaam (Trade) wa kynthup ya ka Almira Making, ka Handheld Device Technician waka Sewing Machine Operator na ka chlem e sikai wa tip kam ka Northeast Institute of Professional Studies (NeIPS) wa em ha Mynthong, Jowai. Ha ka 19 tarik uni u bnai da saam Certificate ko cha ki ha ka yalang tbian wa da pynman ha Community Hall ka Dorbar Chnong Mynthong.
Kani ka e sikai toh kawa haap hapoh ka Skill Meghalaya dei kyrchaanlang ka yung krehkaam u Deputy Commissioner ka West Jaiñtia Hills District.
Ha kani ka sngi da emlang ka Amelia Momin, Assistant Commissioner ka West Jaiñtia Hills District kam ka kongsan, u Lambormi Suchen, Skill Development Officer & Member Secretary District Skill Committee (MSSDS) Jowai kam u symbood kongsan hei emlang u waheh chnong ka Mynthong u Lamphrang Pohktai, kiwa sikai ka NeIPS wa kiwi de.
Ka Amelia Momin hawa klam da pyn-e-daw ko ya waroh kiwa da ye u pyndep yei chah sikai, wei da ong haroh ko wa kani ka sngi ymtoh wa da kut i chah sikai tangwa toh i sdang yong i lai luti yei sikai wa da yoh wei yow yieñ hei yong i hi ki kjat kawa man ka laad ka kabu u sdang yei khih i khan.
Neiliang uwi uwa da pyndep yei chah sikai hawa klam da khana u yei lai luti yong oo ha kani ka chlem e sikai, deiwa khana leh wa man sakhiat kawa e myntoi ya oo heiwa katni oo leh da sdang u da ka dukan yong oo hi.
Discussion about this post