Pyndep ki 139 ngut kiwa na East Jaiñtia yei chah sikai kreh mistri wei chna bordiñ

Ka Greta Solutions Training Academy da pyndep ko yei e sikai wei kamjooh i saam Certificate ynnin ka sngi cha ki 139 ngut kiwa na East Jaiñtia Hills District kiwa da leh ya ka Assistant Masonry Training kawa neibytna kiwa chna yung khyndaw-bilat wa ka Assistant Electrician kawa man ka e sikai taan bordiñ cha ki yung ki bru. 

Ka Greta Solutions Training Academy man ko kawa e Training ya kiwa boon jait ki kaam deiwa ya krehlang waka Meghalaya State Skills Development Society (MSSDS) kam chibynta ka Skill Meghalaya wei em yung krehkaam ko ha laad Dkhiah, East Jaiñtia Hills District.

Ya ka yalang pynkup burom da pynlai da ka Baiakynti Rymbai, Centre Office Assistant hei pait wei pynlai da u Sonjoy Shylla, Centre Head Manager yong ka Greta Solutions Training Academy, deiwa emlang leh u S.R. Marak, Assistant Commissioner ka East Jaiñtia Hills District kam u kongsan chirup u Boimi Dkhar, Skills Development Officer (SDO) ka East Jaiñtia Hills District.

U S.R. Marak kam u kongsan hawa e yei klam da e khublei u ya kiwa da pyndep ya ka Training deiwa ong wa ki toh ki wow pynku ya ka imlang sahlang waka jaitbru deiwa man kam ka nongmuna ya kiwi deiwa em ka sap wa da yoh na kani ka e sikai.

Related posts

Phah ka DC wa waroh kiwa lai Trekking hap ki wow yah wa u Guide

June 30, 2025

Ka sngi chuti wa kyrpang neibynta ka West Jaiñtia Hills

June 30, 2025

Da e khublei u leh ya ka Greta Solutions Training Academy wa da ye ko u pyndep ya kini ka e sikai.

U Boimi Dkhar won da e mynsien wei kwah u leh u wa kiwa da pyndep ya ka Training wa lada toh iwa emkaam wow sdang da ka seiñ yow ye u yarap uwi ya uwi yow pynheh yei khih i khan ki. Deiwa pynrap wa kini ki jait kreh mistri wei chna bordiñ toh kawa hoi khih bha kamjooh ye ki leh wow seiñ khih dei yong ki hi nadooh wow wai dukan wa kiwi de.

Ka Greta Solutions Training Academy toh kawa e chiboon ki sikai hapoh West wa East Jaiñtia Hills nadooh wow chet Cake (Craft Bakery), i sikai chet baam (Street Food Vendor Stand-Alone), i sikai chna bordiñ (Assistant Electrician), i sikai chna yung khyndaw-bilat (Assistant Masonry), i chna Chips, Wine, Aachaar (Food Processing) heiwa ka e sikai man ko 3 bnai.

Hadien wa pyndep ya ka Training ye leh wow e yarap pynyoh thaw kreh namo ka Job Placement.