U symbood montri rangbah ka jylla u Prestone Tynsong da pyntip u wa ka sorkar pyrdi lyngba ka Indian Council of Medical Research (ICMR) da phah pynkylla ki yaka kyndon ha waroh kawi ka ri heiyatoh wa kiwa liwan cha ki jar jiar ki jylla nadooh wa sdang ka 21 tarik uni u bnai.
U Prestone da pyntip u wa neini chakhmat manda psiah kiwa liwan chapoh ka jylla ha ki Entry Point daw leh yaka Rapid Antigen Test wei lada chem wa ym em chah ktah ki ha u COVID-19 daw chah wow liwan ki cha ki yung ki sem yong ki yow leh ki yaka Islolation/Quarantine wa 10 sngi, ym toh de 14 sngi kamwa nachwa.
Lada chem wa yoh ki ya u COVID-19 hadien wa leh yaka Rapin Antigen Test, daw bood yaki kyndon wa nachwa deiwa kit ya ki cha ki Corona Care Centre.
Da ong u leh lada em kiwa ym ye wow leh ya ka Quarantine ha ki yung ki sem, ka sorkar daw kitkhlieh ko ya ini. Chooh chooh da ong u wa nachwa hawa phah ya kiwa liwan wow lai cha ki thaw leh Quarantine, kiwa boon hi toh kiwa kwah wow liwan cha yung.
Hawa kylli, da ong u wa ka Antigen Test toh kawa tikna kawa ye u chaniah hanla kattæ leh emkaam wow leh yaka Quarantine neidaw wa ym tip mynnu u mih ki dak ki chin wa chitom.
Da ong u leh wa i chong kset samen samen toh kawa ktah bha yei pyrkhat pyrdaiñ wei deiwa em ha yung deiwa yoh u yoo u sñiaw ya kiwa yajan daw yarap ko ya kiwa chitom hadooh wow chait smat ki kamjooh wow sñiaw chngaaiñ ki.
