Ka Pnar Students’ Movement (PSM) hadien wa da tip ko wa ka District Malaria Officer (DMO) ka West Jaiñtia Hills da pynhaap ko ya ki chnong Pnar kam ka Deinler, Laher, Moorap, Muriap, Mowlaber, Mooknor cha ka West Karbi Anglong, Assam katkam ka chithi wa da phah cha ka DHS (M), Shillong.
Kamtæ ka seiñ PSM da lai yachem ko wa ka DMO heiwa da pdiang ko wa em i bakla wei dadep pyntip ko yeini cha ka DHS wow ksoh ya kani ka chithi wei ymtoh wow phah cha Assam.
Da kular ko leh wow e yei pynche hajrong kani ka chithi wa da phah ko wei wow pyndam noh ka leh kamwa da dawa ka seiñ.
Neiliang ka seiñ da lai yachem ko leh ya u DC ha Jowai wei da kular u wow chimkhia ya kani ka chithi wa da phah da ka DMO wei da ong u leh wa kini ki chnong toh kiwa dang haap hapoh u pood u ang ka West Jaiñtia Hills wei daw paan pynche u leh na ka DMO.
Ha kani ka chithi da toh wa em kiwa yoh Malaria hapoh ka District tangwa hadien wa takit da chem toh kiwa na ka chnong Mooknor, Muriap, Moorap, Dienglier, Laher Khasi, Mowlaber wa Arbin kiwa em hapoh ka Donka Sub-District ka West Karbi Anglong, Assam.
Discussion about this post