I jia wa ye u pynkylla dur ya ka saiñ hima sima hapoh ka jylla Meghalaya, u Montri Rangbah warim ka jylla uwa man leh uwa yahkhmat ka Liang Pyrchah u Dr. Mukul Sangma deilang wa 13 ngut kiwi ki MLA da pynkhreh ki wow mih noh napoh ka Congress.
Da antaad wa kini ki 14 ngut ki MLA daw psiah ki cha ka All India Trinamool Congress wei em leh kiwa ong wa ye u Dr. Mukul wow sdang da ka Party wa thymme hapoh ka jylla heiwa ya ini daw pynbna myntu hi ka sngi.
Ini waroh i khñium hapoh ka Congress da sdang i nadooh wa thung ya u Vincent Pala kam u MPCC President heiwa u Dr. Mukul ym em sñiawsuk u ya ini i rai neidaw wym em yaklam chwa wa oo. Heiwa u Dr. Mukul da pynyoo u yei pyrchah deiwa khlem lai cha artylli ki yalang ka Party wow pdiang ya ki dkhot kamjooh i pdiang ya u Vincent kam u President thymme.
Neiliang u Dr. Mukul da ong u leh wa ya ka Congress emkaam wow pynbait ya ka luti yong ka wei ym bien u wow yaklam wa kiwon kiwon lait noh ki heh kiwa na Delhi.
Kam wow pynkynmoo wa ini wa dep, u Dr. Mukul da dep u leh wow yachem wa u TMC General Secretary ha Kolkata tangwa da kyntait u wa ini toh yow psiah cha ka TMC.
