15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Pynkrehkaam ka sorkar daka Curfew ha Shillong nadooh myntu i miet

0 Comments
Advertisement ad1
Advertisement ad1
Advertisement ad1

Shillong: Ka sorkar jylla ynne i janmiet da rai ko wow pynkrehkaam da ka Curfew ha ki bynta yong ka Shillong, Sohra wa Ichamati wa ki thaaiñ wa chajan wei wow khang noh chwa chipor ya ki Mobile Internet. Ini i rai yong ka sorkar man ko hadien wa mih i chah thombor ki dkhot ka KSU ha ki baar jylla ha ka chnong Ichamati, East Khasi Hills.

Hawa yoh u yaklam wa u montri ka kaam pohyung ka jylla, u Lahkmen Rymbui da pyntip u wa mar ya tip ya ini i jia ka sorkar da khut yalang jhan ko wa ki heh pulit deilang wa ki bor pynlai District ka East Khasi Hills wow tem ya i kynad.

Da pyntip wa ka sorkar da phah ko ya ki pulit wow kem ya kitu ki bru kiwa emkti ha wow wanrah ya i kulmar ha katai ka thaaiñ kawa wanrah syndon ya i dooh yong i mynsien bru, wei da thung leh ya ka Magistrial Enquiry yow tip ya ka daw yong itai wa jia waroh.

Chooh chooh da pyntip wa ka sorkar da rai ko wow khang noh chwa ya ki Mobile Internet khnang wow lait na i pynpoor ya ki khubor pynchit, wei da phah leh ya ki bor District wow pynkrehkaam noh yaka Curfew nadooh myntu i miet ha waroh kawi ka sor Shillong, Sohra wa Ichamati.

U montri da pyntip chooh chooh u wa ka sorkar da pynkhreh ko wow kdoh u khoom khnang wa ka yakhih ym poor ko cha kiwi ki bynta, da ong u wa ka sorkar da paan yaarap leh na Delhi wow phah pulit, wei myntu i miet daw wan ki CRP na Guwahati cha ka Meghalaya, wei da pyntip chooh chooh u wa kattæ ka sorkar da phah pulit ko leh cha Sohra wa Ichamati yow pait wa ym em iwon iwon i ktah ya ka suk ka saiñ ha ka jylla.

Heijooh i por neiliang u Rymbui da beiñ u ya ini i jia ynne ka sngi wei da kyntu u ya ki paidbah wow man kiwa jai jai neibynta ka chongsuk chongsaiñ wei wow e laad yaka sorkar wow leh ya iwa emkaam yow kem ya ki damok wa pynmih kulmar.

Share this:
Previous

48 kynta u khang Internet ha ki 6 tylli ki District ka Meghalaya

Next

Toh u khyrwit deiwa eh ya kiwa emkti u wanrah um snam ha Ichamati: Hamlet Dohling