Ka All Meghalaya SSA Non-Teaching Staff Association, West Jaiñtia Hills Unit ha ka General Meeting wa da pynman ha 7 tarik uni u bnai ha Yungwalieh ka Dorbar Chnong Chilliangraij hei sakhilang ki dkhot ka seiñ na man ki Block wa em hapoh ka District, da pynman ko i pynkup burom wa kyrpang ya kiwa yahkhmat ka AMSNTSA Central Body wa kynthup ya ka Jennifer Synrem, President wa ya u Barikupar Mylliemngap, General Secretary.
Ha ka yalang wa pynlai da u D. Manner, President AMSNTSA West Jaiñtia Hills Unit kam u chongknor, da e u ki kyntien yahkhmat wei da chimbynta leh ki dkhot wow yaklam ya phyllu chaphang kayi ka thong krehkaam wow lai ka seiñ neini chakhmat neibynta i myntoi wei miat i bha yong ki chakri wa em hapoh ka Samagra Shiksha Abhiyan.
U Barikupar Mylliemngap kam uwa yahkhmat ka seiñ hei e kyntien ha kani ka yalang dap u dei i sñiawngooh sñiawburom wa khroo ya ka AMSNTSA, West Jaiñtia Hills Unit, khamtam ya ki dkhot kiwa da yieñ dap chynrang dap kynthai sakhiat wow sahmiet sah synyaaw ha ki por kiwa ka seiñ pynman ko i yakhih ha u snem 2024 kat hadooh wow yoh yeiwa damut damang ka seiñ, deiwa kyrsu kyntu u ya ki dkhot waroh wow man kiwa yatylli wei yakrehlang chirup wa ka seiñ ha ki por ki sngi kiwa chakhmat neibhah dang boon i dawa iwa toh u leh neibynta i miat i bha yonglang waroh kiwa em hapoh ka lama yong ka AMSNTSA.
Neiliang ka Jennifer Synrem, President AMSNTSA Central Body kam kawa yahkhmat wa em i chynna jngai da e mynsien ko ya ki para dkhot waroh wow em i jooh i pyrkhat, kawi ka thong, kawi ka sur wei ymtoh u ap ær ya ki khubor wa rah ka khlieñ ka latyab khnang wa kam kiwa yahkhmat ka seiñ u nang yoh bor yoh mynsien ki wow kreh chooh yei kaam ha ki por ki sngi kiwa chakhmat.
Chooh chooh da kyrsu kyntu ko leh ya ki dkhot waroh nadooh kiwa em ha ki Cluster, ki Block wa ha ka District wow kitkhia ki u pyndep hok yei kaamram iwa dawa u leh na ki por cha ki por heiyatoh wow man i puræ puthi ha man ki skur yong ka jylla iwa lai bait lai ryntih wei yoh naam yoh burom.
Khaddooh da pynkut ya kani ka yachemlang deiwa yoh ki kyntien khublei na ka Daiamon Khyriem, Executive Member AMSNTSA-WJHU.
Discussion about this post