Jowai : Ka Dorbar Chnong Dulong, Jowai ynne ka 20 tarik da leh burom ko ya ka khyllood Dukini Kyndiah kawa man kawa samen napoh na jylla wa lait ya ka exam UPSC Civil Service Exam deiwa yoh ko ya ka kyrdan wa 1043 na ki 1078 kiwa lait ya kani ka exam.
Kam ka dak wow pynyoo wa katwon man i i dak wa sniaw sarong ya ka Dulong ynne da pynman da ka yalang ha Iungwalieh hei emlang ki dkhot ka Dulong, kiwa heh ka dong wa ki khynnah skur ka Dulong Lower Primary School kiwa da e leh ya i rwai burom ya ka Dukini.
Ki wa klam ha kani ka yalang kam u ma L. Paswet wa ka kong D. Bareh da yaroh ki ya ka Dukini ya ini i moomer wa da poi ko wei man sakhiat ko u khloor wow yahluti leh ya kiwi yow bood luti yei wa da pynyoo ko.
Da sam cha ka Dukini ya ka Certificate of Appreciation wa ya ka Memento yow pynyoo yei dak wa burom ya ka.
Ka Dukini hei klam yong ka ong ko wa ha i pyrthai wa katni du i stad hi wa ye u yarap ya kiwa dooh wa duk yow rah ya ki na i eh wa boonjait wa em ha pyrthai.
Da kyntu ko leh ya ki bei ki pa wow kyrchaan ya ki khon ki kti manda jied ki ya laad wa puræ wa boon jait. Da kynmo ko wa ka ha i por wa pyndep ko ya ka Class XII yong ka yoh ko du 52% wei boon ong ki ya ka wa lada ym yoh laad hi u lai Engineering wa Doctor ym thaw de da iwi ha kani ka juk katni. Tangwa ka ym em dooh mynsien wei na yung ko kyrchan bait ki ya ka ha waroh wa jied ko na liang i puræ puthi.
Ya ka yalang ynne ka sngi da pyllai da u Waheh Chnong u D. Dkhar.
Discussion about this post