15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Pynkup burom u BDO ka Amlarem ya u khynroo wa chah jied ha ka FC Goa

Advertisement ad1
Advertisement ad1

Hadien wa yoh ya ka Wyrta wa sñiawkmen wei kawa pynsñiaw sarong ya ki paidbah ka Ri-loom Jaiñtia hadien wa chah jied uwi u khynroo wow yalehke na ka FC Goa, ynne ka sngi da pynkup burom ya uni u khynroo ha ka yalang wa tbian wa da pynman ha ka yung krehkaam u Block Development Officer (BDO) ka Amlarem. 

Uni u khynroo uwa pnah bha ha ka yalehke Football toh u Phrangki Buam uwa 19 snem na Thangbuli wei toh u khon ka Childa Buam wa u Manmi Kassar.

Advertisement ad1

U Phrangki ha kini ki por wa dadep da jooh yalehke u leh na ki Club waphær waphær na chnong wa na Shillong wei ha kani ka kynti da soi soskular u wow yalehke na ka FC Goa ha ka 17 tarik uni u bnai neibynta ka samoi wa 3 snem. 

Kani yalang pynkup burom ya u Phrangki toh kawa da leh dei bor samen u BDO, u Dr. D. Lyngdoh kam ka dak wow pynchlur ya ki khynroo khyllood ha ki kaam yalehke Sports wa ha rukom.

Ha kani ka yalang pynkup burom ya u Phrangki da emlang u BDO ka Amlarem, u Dr.  D. Lyngdoh; u BDO ka Laskein Block uwa man leh u President ka Futsal Meghalaya, u Dr. B. Lyngbang; u DSO ka West Jaiñtia, u K. Passah, u President ka Synjuk ki Rangbah Shnong, u Daniel Khongsit wa kiwi kiwi.

Ya ka yalang ynne ka sngi da pynlai da u Dap Tariang uwa man leh u General Secretary ka Amlarem Sub-Division Sports Association.

Kiwa klam ha kani ka sngi da e ki ya ki kyntien sneiñ kyntu ya u Phrangki dei kyrmen wa neini chaphrang wow ye u wanrah naam u ym du ya ka thaaiñ, ka District wa ka jylla tangwa u man u leh kam u nongmuna ya kiwi wow man ki kiwa minot wei wow bood ki ya ka luti wa yah u.

Share this:
Previous

170 ngut kiwa dang yoh, 153 kiwa dang chait wa sa 4 ngut kiwa dang yap na u COVID-19 ha Meghalaya

Next

Ujor ka KSU pyrchah ya ki wakreh ka Post Office Thangrain