Ka Jaiñtia National Council (JNC) ha ka 10 tarik uni u bnai ha ka yalang lehkmen yei dap 9 snem i lai luti ka seiñ wa da pynman ha Community Hall Khliehriat West, East Jaiñtia Hills District da pynlait paidbah ko yaka Music Video wa e pyrtuid “Ri Jaiñtia” ya kawa da rwai da ki dkhot kani hi ka seiñ.
I pynman yaka seiñ u chna ya ini i sur toh hadien wa yoo ki wa haka State Anthem Song yong i dap 50 snem ka jylla Meghalaya wym em pynpsiah yei ktien Pnar.
Ha ka yalang pynlait paidbah da sakhilang u Bisharbha Pala kam u kongsan, kiwa yahkhmat seiñbhalang wa kynthup ya u President ka JSU, u Jersome Shylla, u President ka JSM, u Lenning Star Rymbai, u K. Ksoo uwa man kam u muktiar wa bna naam ka thaaiñ, ka Jhanita Siangshai najrong ki dkhot ka seiñ wa kiwi wa chah khut sñiawbha.
U Jersome Shylla hawa klam ong u kam ki seiñbhalang hanla phær i rong sula kawi na kiwi leh tangwa em ki kawi don ka thong katæ toh neibynta u yada yaka ri ka jaitbru. Da ong u leh wa ka seiñ da yakrehlang ko neibynta i bha i miat ka imlang sahlang, wei kamjooh leh da pynkynmoo u hajrong i emkaam ya ka ILP haka jylla wa boon ki paidbah sñiawthooh bakla ki ka deiwa ong wa daw dooh khih, tangwa iwa sakhiat hi man ko kam ka License donhi wow paitbniah yaki bru wa psiah wa mih neibhah kamwa man kattæ katwa ngait hi-eh yoh ki baar jylla u psiah u chong u sah haka jylla.
U President ka JSM, u Lenning Star Rymbai da klam u hajrong i man kiwa yahkhmat, wei kiyi ki bynta wa emkaam ha kitæ kiwa yahkhmat wa sakhiat.
U K. Ksoo hawa yaroh yei lai luti ka seiñ JNC wa man ko ka seiñ wa stat wa chemphang u chim yaki mat waphær waphær, pynkynmoo u leh yei kyntien wa klam u woh Kiang Nangbah chwa u chah pasi u iwa ong u lada kyruiñ i khmat O cha mihsngi hapoh 100 snem u laitlooid ka ri, kamtæ booh u i yukylli ya ki paidbah, ki seiñbhalang wow paitbniah u pynchong pynthiah ki wa lada man sakhiat i kiwa da laitlooid katni hei lai i wan, ha ka imlang sahlang, i kreh i khih, i yada yaka jaitbru wei yei jubab lym yoh myntu leh ha iwon iwon i por daw yoh.
Kyntu u leh ya ki wow nang kreh bha chooh chooh ki chaphrang neibynta i bha i miat ka pateiñ mynried, khlem da booh yukylli ya ki pateiñ chadien.
Neitæ won u man leh ki bru wa pynpliah ym du hei doh i pran tangwa hei bor jabeiñ, i bor mynsien khang yow ye u yakhun ya iwon iwon i eh wa wan.
U President ka JNC, u Sambor Lyngdoh hawa klam ong u 9 tylli ki snem sñiaw wa dang tbian bha, tangwa la kyruiñ yei lai luti kiwa yahkhmat ki dkhot won man iwa jrong wei em i por parsnieh wow kynmoo, neibhah hei yakhun neibynta ka ri ka jaitbru da maad ki chiboon i chah pynchitom, i chah dat haki bor ka aiñ wei chah pynngat kyndon.
Kynmoo u leh wa heipor wa lehkmen dap chi snem ka seiñ da chah kem u khlem kiwon kiwon ki daw, neibhah wa ha kitu ki por yei bor ka aiñ namo Judicial da ksoh da ki DC, SP wa Magistrate heiwa da leh ki katwa ngait tang wow yoh pynngat ya oo deiwa emktilang kiwa mihkhmat paidbah wow e diñ u kem yaki dkhot ka seiñ, katwa hei rta wa dang khian ka seiñ chim ko yaki mat khlem da pyrkhat yei chah ktah ki MLA, MDC, MP deiwa pait yaki mat wa chah ktah ka jaitbru.
Ong u leh wa heipor wa chong patok u 4 bnai poi i pyrkhat ha oo wow iehnoh yei kaam chakri paidbah katwa da em i chah pyntieñ pynsmiej ha kitu ki por. Wei man leh i dooh kyrmen wa joor bha kat wym em i bichaar hok neidaw wa ksoh ka Executive yei bor ka Judicial.
Tangwa hadien wa lait patok won u sñiaw u da wiar lut iwa pyrkhat u deiwa sñiaw heh chooh chooh pathan i mynsien u chakri paidbah wot hadooh ynne ka sngi.
Neitæ da pynkynmoo haroh u hajrong ki le tylli ki yurim u moobynna wa em haka Moto ka seiñ iwa kynthup ka Tipkur Tipkha, Tipbru Tipblai wei Kamai Yei Hok.
Neiliang u kongsan, u Bisharbha Pala hawa klam ha kani ka sngi da yaroh u yei kaam ka seiñ JNC wei pyn-eh-daw u leh wow nang ye ko u kreh bha chooh chooh sam chaphrang neibynta i myntoi ka imlang sahlang waka jaitbru hi waroh kawi.
Chwa ini da yoh i pynsñiaw yaka Report krehkaam ka seiñ na u Wanshwa Suting, General Secretary yong ka JNC, i klam pdiang na u Ency Shadap, Vice President JNC wa kiwi haka yalang wa pynlai da u Mehi Rymbai, Art & Cultural Secretary ka JNC.
Ya ka Music Video da pynlait ha u YouTube Channel wa pyrtuid “JNC-Jaiñtia National Council”.
Discussion about this post