Le ngut kiwa suba toh ki dkhot ka NSCN (K-YA) da chah siat yap ki ha ka Assam Rifles ha i yaleh wa da jia ha iwi i khloo wa em hapyrdi i chnong Kaimoi wa Khogla kiwa em hapoh ka Longding District ka Arunachal Pradesh hei step ka 15 tarik.
Ki pulit da pyntip ki wa ya ini i kaam da leh da ka 6th Assam Rifles (AR).
Ki pulit da pyntip ki wa kini ki bru wa suba toh ki dkhot ka NSCN (K-YA) da rahbor ki ya u waheh chnong ka chnong Laho uwa tip kam u Ranwang Lowang wa u dkhot warim ka ASM uwa tip kam u Sunwang Hakhun kiwa da chah rah heipor kamwa 6:00 waje i miet ha ka 14 tarik. I chnong Laho toh iwa em hapoh ka Tirap District iwa yajan waka Longding.
Ki pulit da pyntip ki leh wa uwi u bru wa tip kam u Johny Sumnyan, Ex-Revenue Secretary ka NSCN (K), da toh u wow su T. 7 lak cha katai ka seiñ wa rahbor ya ki arngut kawa da dawa T. 7 lak na kiwa chong chnong kawa hap ki wow su chwa ka 20 tarik uni u bnai.
Neiliang ki chipai ka 6th AR da chem ki ya kini kiwa rahbor hapoh khloo heipor kamwa 8:00 waje i step ka 15 tarik heiwa da em i yasiat heiwa 3 ngut ki dkhot ka NSCN (K-YA) da yap ki wei uwi u chipai ka AR da mynsoo ha ki bynta ka kti, da pyntip ki pulit.
Ya kiwa yap da kit cha ka CHC yow leh Post-Mortem.
Neiliang u SP ka Tirap, u Kardak Riba da pyntip u wa ki pulit ka Tirap da lai ki wut wut mar ya tip ki wa e mini i chah rah bor.
Da pyntip u leh deiwa yarap ki bru da chem ya u Sunwang Hakhun najan ka wah Tissa katwa ya u Ranwang Lowang da chem na ka khloo wa em cheiliang sepsngi ka chnong Laho.
