Ka chnong Sohmynting kawa man kawi na ki chnong wa da rim tam ha West Jaiñtia Hills, da pynman ko ya ka tamasa Saphlang Festival kawa heh deiwa lehkmen leh ya ka riti dustur nadooh i rukom rep wa kyrpang iwa da kyrchaan yei kamai kajih ka imlang sahlang.
Uwi na kini ki jiat mar rep toh uwa tip kam u Saphlang uwa mih katkam ka samoi wei uwa bang bha ki bru wow baam wei uwa da rep bha ha kani ka thaaiñ heipor tlang wei da khloh napoh khyndaw ha ki bnai kut snem.
U kongsan ha kani ka tamasa toh u M.B. Rymbai, MDC uwa da e khublei ya ka dorbar chnong wa ya ka Earth Tree Enviro Pvt. Ltd. kawa da ye wow pynman ya kani ka tamasa. Da pynsñiaw u leh yei sñiawkhia hajrong i sdang duna kiwa rep ya u Saphlang wei da kyrmen u wa kani ka tamasa daw pynkhai biang ko yei mynsien kiwa chong chnong wei daw pynchlur ko leh ya ki wow pynmih ya uni u mar baam.
Kawi na kiwa rep Saphlang da slem bha, ka Romika Pyrtuh kawa da kamai ja-kpoh na u Saphlang da palat 30 snem, da ban joor ko wa u Saphlang ymtoh du u mar rep tangwa da man u leh kam chibynta ka riti dustur yong ki.
Da batai ko leh chaphang i rukom rep ya u Saphlang uwa da emkaam yei maya wa i thaw wa biang kamjooh i rukom ah wei pynkhooid wa kiwi ki bynta wa emkaam sumaar. Da ong ko wa man u leh i jait baam wa ka-it bha ki paidbah najrong wa man u leh kam i dawai.
U Dr. E.S. Langshiang, uwa da puræ bniah bha ya ki jait thung wa ki khñiang ha ka chnong, da yaroh u yei rukom im yong ka imlang sahlang kawa da slem bha wow yada ya ki khloo ki kjam deilang ki khloo wa kyntang. Wei ka Sohmynting em ko kattu katni ki khloo paidbah, ar tylli ki khloo kur wa kawi ka khloo kyntang kiwa waroh yarap yei man yirngam ka chnong.
Neiliang u u Dr. H.H. Mohrmen da ong u wa ka chnong Sohmynting toh kawa ye leh wow man kam ka thaw uiñke suwari wei da pynsñiaw u yei kyrmen wa ka Earth Tree deiwa ya krehlang wa ka dorbar chnong chirup ka chnat Tourism daw yarap u pynku ya ka Sohmynting kam ka Tourist Spot.
Da ong u leh wa hawa rep deiwa pynemkaam da ki rukom rep tynre, sñiawsih won wow yoo wym ye dor ki wow dai katkam wa toh u yoh ki ha ki yaaw ki haat.
Neiliang won u Puramon Kynjing, Dolloi ka Elaka Jowai da pynkynmoo u ya ki paidbah wa ki jhoor wa da thung ha Sohmynting toh kiwi na kiwa thooh bha ki bru ha Iawmusiang neibhah wa kiwa thied tip ki wym em pynemkaam dawai ki.
Ka D.S. Shylla, District Tourism Officer, WJH da khana ko wa ka sorkar da yaleh bha ko wow pynku ya ki kaam uiñke suwari hapoh ka District, kamtæ da kyntu ko ya ki khynroo khyllood wow chim kabu yeini wa leh ka sorkar katni.
Kiwi de kiwa klam kynthup ki ya u J. Pyrtuh, u Dolloi ka Elaka Amwi Sohmynting wa u M.L. Pyrtuh, Assistant Waheh Chnong ka Sohmynting.
Ha kani ka tamasa da yoh leh ki chaad tynre wa i pynyoo rong ya ki Saphlang wa ki jhoor.
Discussion about this post