Ynne i step ka 29 tarik, ka KSU Jowai Unit da yoh ko wow pynman ya ka “Open To All Long Distance Running Race” kawa man kam i dak lehkmen ya ka lyngkhooh dap ar snem ka Jowai Unit heiwa da wan wow chimbynta da kiwa boon ki kynthai wa chynrang.
Ya kani ka yaphet da sdang nadooh na Laad KNGC deiwa lai luti lyngba ka Ladthadlaboh-Newhill- Iawmusiang-Lad Pohskur-Iongpiah-Panaliar-Civil Hospital warim-Le Kyrnah wei da pynkut ha u mot U Kiang Nangbah wa em ha Syntu Ksiar.
Ha kani ka step da emlang leh u Awhai Andrew Shullai, MDC Jowai Central kam u kongsan uwa da saam leh ya ki khusnaam deiwa emlang kiwa yahkhmat ka KSU Jowai Circle, kiwa yahkhmat ka KSU-WJHD Unit, u Leningrad Tariang, General Secretary wa u Phrangki Papeng Finance Secretary.
Kiwa jop neiliang ki chynrang man ki kamni:
1) Kordor S. Manners
2) Eibor Kyndait
3) Sanctify Pale
4) Khainti Shylla
5) Alan Banda Rymbai
6) Shibor Shadap
7) Daioo- Hi-Mitre Suting
8) Ioobiang Langstang
9) Chanmeki Chyrmang
10) Ram Shylla
Kiwa jop neiliang ki kynthai:
1) Happiness Phawa
2) Levina Papiah
3) Monlangki Kyndait
4) Ribity Sana
5) Rika Dametre Bareh
6) Syndong Shylla
7) Beauty Shylla
8) Ewadaeimi Phawa
9) Mini Kyndait
10) Phrui Phawa
U kongsan hawa e yei klam da kyntu u ya ki khynroo khyllood wa maya yei yaleh Sport wow em sakhiat ki yei mynsien yaleh yow poi cha ka thong wei wow pait ya ki buit ki budia kammon wow pynpliah ya idæ lyngba i stat wa em ha ka Internet kam hei phet ya ki Marathon.
Neiliang u General Secretary, u Leningrad Tariang hawa e yei klam da ong u wa hanla ka sorkar ym ye ko wow pynku ya ki kaam Sport hapoh ka jylla, tangwa ym toh wow dooh mynsien wei wow kreh chitom hadooh wa poi cha ka thong.
