15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Pynman ka KSU yaka yalang pyrchah CAA ha Amlarem

0 Comments
Advertisement ad1

Ka Khasi Students’ Union-War Jaiñtia Circle ha ka 11 tarik uni u bnai da pynman ko yaka yalang paidbah ha Amlarem kam chibynta wow pyrchah ya ka Citizenship Amendment Act wei wow dawa pynkrehkaam syndon yaka Inner Line Permit (ILP) hapoh ka jylla.

U Sadon K. Blah General Secretary ka HNYF da beiñ joor u ya ka sorkar kawa da kular ha ka 19 tarik December 2019 lyngba ka Special Session wow pdiang ya ka Resolution yow pynbor ya ka sorkar India wow pynkrehkaam syndon yaka ILP hapoh ka jylla ka jong i, tangwa ini kut i du ha i rai hadooh katni ym em i dak wow yoh yaklam wa u Home Minister Amit Shah neibynta wow pynkrehkaam ya ka ILP, kamtæ da kyntu u ya ki paidbah wa toh u pynkrehkaam noh hi da ka yong ki ka aiñ hapoh chnong pohthaw neibynta wow khang laad yei leh tre yong ki mynder ri næ ki baar jylla.

Neiliang u Lambokstar Marngar, President ka KSU da beiñ joor u ya ki bru wa kwah snam kiwa na i por cha i por chim kabu hei wow pynmynsoo wow pynjoo snam ya ki paradoh parasnam kiwa sah cha ki thaaiñ khappood wei da pynrem joor u ya ki chipai BSF kiwa man du kam kiwa paitke hawa ki khar Bangla wan psiah ki cha ki chnong khappood wow pyntieñ pynsmiej ya ki paradoh parasnam yong i, wei da maham joor u leh wa lada ka sorkar ym ye ko wow e yada da iwa biang, neiliang ka seiñ wa ki paidbah ym yohsa ki wow chim ya ka aiñ ha ki kti yong ki wei ki leh ym salia ki wow leh lang kamwa leh kiwi, kamwa ki leh em ki ka wait i leh em i ka wait, u khnam, u ryntieh yow hiar thma kylla ya ki wei ha kam kini ki por, ka sorkar to u chim ko yei bah khlieh lada jia iyi iyi. Chooh chooh da ong u wa neiliang ki soo seiñ ym pdiangki la man kammon kammon yaka Citizenship Amendment Act wei da dawa leh wow pynkrehkaam noh syndon yaka Inner Line Permit.

Kiwi de kiwa klam toh u President Synjuk Rangbah Shnong War Jaiñtia u Kolmen Pohshna, u Ohibait Dkhar President KSU-JHDU, u Leningrad Tariang Organising Secretary KSU-JHDU, u Ostarnic Marbaniang Assistant Organising Secretary seiñbei wa u Rijiedmi Lamin President Nongtalang College Student Union.

Ya kani ka kyrwoh da phah da u General Secretary u Lurman B. Talang.

Share this:
Previous

Chah kyrriah tarik ka F1 Chinese Grand Prix neidaw u Coronavirus

Next

Wai u Prestone ya ka Milk Collection Centre