Pynrem ka KSU wa NESO ya ka sorkar India wa mynjur ko ya ka CAB, 2019 ha LS

Shillong: I mynjur yong ka sorkar National Democratic Alliance (NDA) ha Lok Sabha ya ka Citizenship Amendment Bill, 2019 hapyrdi i pyrchah na kiwa boon kiwa chong chnong ka thaaiñ mihngi ynnin ka sngi, da wanrah ko ya i pynrem na kiwa boon ki seiñbhalang ka thaaiñ kiwa da pynsñiaw wa toh i lehbor wei wow yoohbeiñ ya ki bru wa khian paaid.

“I rai yong ka sorkar India ha LS wow monjur ya kani ka Bill pynyoo ko yei wym kheiñ snep yong ka ya i man tre ri yong ki jaitbru ka thaaiñ mihsngi waroh kawi,” da ong u Chairman ka North East Students’ Organisation (NESO), u Samuel Jyrwa.

Da ong u wa ini i leh ka sorkar India toh i thmu wa sih wei booh ko hei ma ya kiwa khian paaid ki jylla ka thaaiñ mihsngi.

U Samuel da ong u wa i khut khang chnong yong ka NESO ynnin ka sngi ha waroh kawi ka thaaiñ mihsngi toh wow pynyoo ha khmat ka sorkar India hajrong i sñiaw ki paidbah ka thaaiñ yei ma iwa yang chwa lada pynman aiñ ya ka Citizenship Amendment Bill.

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

“Ki MP wa pyrchah ya kani ka Bill ym ye ki wow ya ksaid neibhah wa duna paaid ki hapoh ka LS wei i daw chim i da kawi ka rai kammon u leh yow pyntikna wa kani ka Bill ym man aiñ ko,” ong u Samuel.

Neiliang u President ka Khasi Students’ Union (KSU), u Lambokstarwell Marngar da ong u wa ka seiñ ka pyrchah ko ya ini i thmu yong ka sorkar India nadooh i por wa ka Joint Parliamentary Committee (JPC) da wan poi ko ha Shillong wow ap yei sñiaw kiwa chong chnong hajrong kani ka Bill.

“I chim i wa kani ka Bill toh kawa daw lehbeiñ ya ki bru ri-loom wa khian paaid neibhah kani ka Bill ka sorkar India ka kwah ko wow yada wei wow khut chooh chooh ya ki mynder na Bangladesh,” ong u Marngar. “I u pyrchah joor hi wow noh chi syndon ya kani ka Bill,” da pynrap u.

Da pynbaad u leh wa i wanrah ya kani ka Bill da ka sorkar NDA wa yahkhmat da ka BJP toh yow pynkhlan ya ka Vote Bank yong ka BJP ha ka thaaiñ mihsngi yow wan biang ko ha i bor.

“Kani ka Bill ym em klam ko kammon u yada ko ya ki tre ri tangwa kdung ko ya ki mynder wei lada poi u pood wa ki khynroo ka thaaiñ ki hap ki wow rah tiar heithaw u khulom, ka sorkar India toh u chim ko yei kitkhlieh,” ong u Marngar.