Kawi ka khynnah khyllood wa dang 20 snem, ka Rifiness Warjri kawa man ka NCC Cadet na Meghalaya da booh naam ko deiwa ku ya u loom wa jrong dooh ha pyrthai, u Mount Everest (8,849 meter) heiwa da poi ko ha khlieh uni u loom heipor 4:45 i step ka 18 tarik uni u bnai.
Ka Rifiness toh kawa lai puræ ha St. Anthony’s College wei man ko ka dkhot ka 61 Meghalaya Girls Battalion NCC wei da mihkhmat ko ya ka North Eastern Region ha ka NCC Mount Everest Expedition 2025 wei da embynta ko wa ki 38 ngut kiwi waroh wa da chah jied na ka ri wei man ko du ka kawa chah jied na North East.
Deini da man ko kawa le na Meghalaya wow ku ya u loom Mt. Everest hadien ka Wansuk Myrthong (2013) kawa man kam ka pulit wa ka Senior GCI Dolyne Kharbhih (2016) na ka 61 Meghalaya NCC Battalion kawa jooh man kam ka NCC Cadet na Ri-Bhoi.
Ka Rifiness chwa u ku ya u Mt. Everest, da ku ko ya u Mount Abi Gamin (7,355 meter) ha Uttarakhand ha u Naisaphra 2024 uwa man u loom wa eh bha u ku.
Ya ka Rifiness da kha ha Jylli Shop wei da heh ko ha Kynton-u-Mon, Laitkor, wei man ko kawa le na ki san ngut chi payu heiwa u pa ko toh u Shlurbor Kharmyndai wa ka bei ko toh ka Diamondsea Warjri.
I ka-it ko wow ku loom da sdang i nadooh wa man NCC ko na ka Auxilium Convent Shillong wei man ko leh kawa yalehke Wushu wei kam ka Kickboxer.
Discussion about this post