Ynne ka sngi hadien wa ki kattu katni ngut kiwa kreh ka National Peoples’ Party (NPP) hapoh East Jaiñtia Hills da mih ki na ka seiñ ynnin ka 6 tarik, ynne won wut-wut da pynman ya ka yalang wa jhan heiyatoh wow pynskem pura noh ya kiwa kitkaam ka Party hapoh ka District.
Hadien kani ka yalang hawa yaklam wa ka Santa Mary Shylla kawa man leh kam ka kyrtong ka NPP na Sutnga Saipung Constituency kamjooh ka NPP President ka Constituency, da ong ko wa i mih ki kattu katni ngut na ka Party ym ktah i ya ka tangwa man i leh kam i kyrkhu ya ka seiñ ha District wow man ko kawa rap skem hei kreh yong ka.
Da ong ko wa kiwa kitkaam ka District wa ka chnat khynroo namo ka Youth Wing da mih noh ki na ka Party neidaw yong ka kam ka kyrtong ym neidaw ka Party wei ym khyrngiat ko leh yeini neibhah kut wa man yalang kini kiwa da mih ym jooh wanpoi ki cha kini ki yalang wa da khut 2-3 sien.
Chooh chooh da ong ko wa i iehnoh kini ki bru na ka Party ym pyntlot i ya ka seiñ neibhah kat dang mih ki sngi kiwa psiah cha ka seiñ dang joor i.
Ha kani ka yalang wa man ynne da jied ya u MDC ka Sutnga Narwan, u Seiborlang Shadap kam u District President wa thymme katwa ya ka chuki General Secretary da e cha u Dr. Sankey Shangpung uwa man leh u MDC ka Bataw Lakadong katwa ya ka chuki Working President won da chim da u MDC warim u Joinriwell Pyrtuh.
Heiyatoh wa ka chnat khynroo ka NPP namo ka Youth Front, da jied President ya u Emlangki Lamare uwa man leh katni u MDC ka Narpuh Constituency, u General Secretary, u Rio Shadap, u Working President da u Defender Pakem wa u Kermiky Dkhar.
Da jied leh ya u Daiapherbha Lamare kam u Vice-President ka Party wa ya u Merary Sutnga kam u Assistant Secretary ka East Jaiñtia Hills.
Kiwa kitkaam ka 5-Sutnga Saipung Block, NPYF da jied President da u Syrosse Lamare katwa u Assistant Secretary won toh u Metipbha Supooh wei u Narpuh Circle-Vice President won da jied ya u Romeo Pdang.
Puræ leh: Mih noh kiwa ksoh kaam ka NPP wa NPYF ha 5-Sutnga Saipung Constituency
