Jowai: Ka Khasi Students’ Union (KSU) da pysñiaw ko yei sñiawsih yei khlaad syndet u dkhot warim yong ka u Rudy Lyngdoh Tron ha ka step yong ka 25 tarik uni u bnai. Ka seiñ da pynsñiaw ko leh yei dooh nong na i khlaad uni u khynroo uwa da chakri wei da e kti doh wa mynsien neibynta ki dawbah ka jaitbru nadooh wa psiah u cha ka KSU hadooh ki sngi wa khaddooh ki yong oo.
U Rudy da psiah u cha ka KSU kam u dkhot ka KSU Lummawbah Unit wei da ksoh u leh kam u President kani ka Unit waka Upper Shillong Circle. Ha u snem 2008 da yoo biang ya oo wow man u kam dkhot ka Central Executive Council (CEC) kawa ha kitu ki por wa yahkhmat da u Samuel B. Jyrwa wa u Hamlet Dohling. Ha u snem 2012 da jied ya oo kam u Assistant Organising Secretary ka KSU CEC hapoh i yahkhmat u Daniel Khyriem wa u Auguster Jyrwa. Da ksoh u ya kani ka kaam hadooh wa chong ngiah u ha u snem 2017. U Rudy jooh man u leh kam u In-charge yong ka KSU North Khasi Hills District Unit.
Ka seiñ da phah ko leh ya i sñiawlem cha ka yung ka sem ka yong oo ha ini i por wa sñiawsih wei u emlang ko wa ki ha kam kini ki por wei ym mylliñ ko ya ki kaam wa leh bha uni u khynroo ya ka jaitbru.
Discussion about this post