Shillong : Ka party Congress ynne ka sngi da pynman ko ya i yakhih wow kerkut næ gherao ya ka Office ka RBI wa em ha hajan ka St. Edmunds School, Shillong kam wow pyrchah yei pyndam syndet ka sorkar BJP ya ka poisa T. 500 wa T. 1000.
Ya ka lai paidbah da yahkhmat da ki montri wa ki heh ka Congress kiwa kynthup ya ka Ampareen Lyngdoh, u Ronnie V Lyngdoh, u Rockybul Hussain, Takam Sanjoy wa kiwi kiwi.
Manda poi haphrang ka Office RBI da mih syndet ki dkhot ka Thma U Rangli Juki (TUR) wa ka Civil Society Women’s Organization (CSWO) kiwa da sdang u kbai ya ki kyntien wa ong ya ki dkhot ka Congress wa pyndur hi eh ki yeini i yakhih neibhah ki leh man ki kiwa baamtooh kam ka BJP hi.
Ki dkhot ki ar seiñ da beiñ ki ya ka Sorkar Congress hapoh ka jylla wym ye ko u thung ya u Lokayukta kamjooh leh ya ka BJP ka wym ye u pynkrehkaam ya ka aiñ Lokpal na ka sorkar pyrdi.
[arve url=”https://www.youtube.com/watch?v=bMgJUcvlg7s”/]
Heipor wa dang klam pyrchah ki ya ka Congress ki paidbah na ka liang pyrchah da sdang ki u ya kbai ya kyriaw.
Ka heh yong ka TUR ka Angela Rangad da kylli ko iyi wa jia hei yatoh i thung kaam wa sikai kawa tip kam ka Education Scam wei neiyi i daw wym em u kem ya ki, kamjooh leh ya kiwi ki kaam chukor, wei neiyi i daw wym em u chah kem ki.
Ka Angela da klam pyrchah ko leh ya kiwi ki seiñ saiñpyrthai ri-loom wa kiwi kiwi ki wym pynkhih wow pynkrehkaam ya ka aiñ Lokayukta iwa pynyoo wa ki leh emkti ki wow baamtooh na ki paidbah.
Ka president ka CSWO ka kong Agnes Kharshiing da kylli ko na ki paaid ka Congress wa cheiwon em ki heipor wa ki kaam pyrchah ya ki kynthai wa ki khynnah dang ku ki kat dang lai ki sngi.
Wei da beiñ ki leh ya ki heh wa ki montri kiwa wan yakhih da ki kari light soo næ ki kari VIP iwa man i kaam pyrchah ya ka aiñ wei iwa pynemkaam bakla ya kini ki kari.
Neiliang ka Congress won da ong ki wa waroh ki bru em hok ki u sai ya ka poisa yong ki wei da dawa ki wow hair chuki noh u Governor ka RBI.
Discussion about this post